हारपछि गगन थापा पछि हट्ने कि अझ बलियो भएर नेतृत्वको लडाइँमा उत्रिने ?
काठमाडौं । पछिल्लो राजनीतिक घटनाक्रमसँगै नेपाली कांग्रेसका सभापति गगनकुमार थापाको भूमिकाबारे पार्टीभित्र तीव्र बहस सुरु भएको छ। निर्वाचनमा अपेक्षित परिणाम नआएपछि उनीमाथि राजीनामा दिनुपर्ने दबाब बढेको छ भने अर्को पक्षले भने अहिले नै नेतृत्वबाट पछि हट्नु समाधान नभएको तर्क गरिरहेको छ।
विशेषगरी पूर्वसभापति शेरबहादुर देउवा निकट समूहले गगनले नैतिकताका आधारमा पद छोड्नुपर्ने आवाज उठाइरहेको बताइन्छ। तर गगन पक्षका नेता–कार्यकर्ताहरूले यो दबाबलाई आन्तरिक शक्ति संघर्षको रूपमा हेरेका छन्। उनीहरूको दाबी छ—गगनले राजीनामा दिए कांग्रेस फेरि पुरानै शैलीको व्यक्तिकेन्द्रित राजनीतिमा फर्किन सक्छ।
राजनीतिक विश्लेषकहरूका अनुसार गगन अहिले दुईवटा बाटोको दोबाटोमा उभिएका छन्। पहिलो, हारको नैतिक जिम्मेवारी लिएर पद त्याग गर्नेस दोस्रो, पार्टीभित्र सुधार र नयाँ राजनीतिक एजेन्डासहित नेतृत्वको चुनौती स्वीकार गर्ने।
कांग्रेसभित्र पछिल्लो समय देखिएको शक्ति संघर्षले पनि गगनको निर्णयलाई महत्वपूर्ण बनाएको छ। परिवर्तनको एजेन्डा लिएर अघि बढेको भनिएको युवा नेतृत्वको समूहले उनलाई आफ्नो प्रमुख आशाका रूपमा हेरेको छ। यस्तो अवस्थामा उनले राजीनामा दिए त्यो समूहको भविष्य नै अन्योलमा पर्ने आकलन गरिएको छ।
कतिपयले भने गगन आफैंले मिडियामार्फत ‘राजीनामा दिने’ चर्चा फैलाएर सहानुभूति बटुल्न खोजेको आरोप समेत लगाएका छन्। तर उनका समर्थकहरू भने यो आरोप अस्वीकार गर्दै अहिले कांग्रेसलाई पुनर्जीवित गर्न गगनजस्तो सक्रिय नेतृत्व आवश्यक भएको बताउँछन्।
राजनीतिक दृष्टिले हेर्दा गगनको आगामी निर्णयले कांग्रेसभित्रको शक्ति सन्तुलन मात्र होइन, पार्टीको भविष्यको दिशासमेत तय गर्ने विश्लेषण गरिएको छ । यदि उनले राजीनामा दिए भने देउवा समूहको प्रभाव थप बलियो हुन सक्छ। तर यदि उनले नेतृत्वको चुनौती स्वीकारेर अघि बढे भने कांग्रेसभित्र नयाँ राजनीतिक प्रतिस्पर्धा र पुनर्संरचनाको बहस अझ तीव्र हुने सम्भावना छ।
अहिले प्रश्न एउटै छ—हारपछि गगन थापा पछि हट्ने कि अझ बलियो भएर नेतृत्वको लडाइँमा उत्रिने ? कांग्रेसको आगामी राजनीतिक यात्रा धेरै हदसम्म यही निर्णयमा निर्भर देखिन्छ।
