सिन्धुपाल्चोक–२ मा युवराज दुलालको उम्मेदवारीप्रति बढ्दो आकर्षण
काठमाडौं । युवराज दुलालको नाम अहिले सिन्धुपाल्चोक क्षेत्र नं। २ को राजनीतिक बहसको केन्द्रमा छ। भूकम्प, कोरोना महामारी र मेलम्चीको विनाशकारी बाढी–पहिरोजस्ता बहुआयामिक विपत्तिहरूले थिलथिलो बनेको यस क्षेत्रले वर्षौंदेखि संकटसँग जुध्दै आएको छ। यस्ता कठिन घडीमा अग्रपंक्तिमा उभिएर राहत, पुनर्निर्माण र समन्वयको नेतृत्व गर्ने व्यक्तित्वका रूपमा दुलाललाई धेरैले सम्झिने गरेका छन्। २०७२ सालको भूकम्पपछि घर निर्माण र पुनर्स्थापनाको काम तीव्र बनाउन उनले देखाएको पहल, महामारीका बेला स्वास्थ्य सामग्री व्यवस्थापन र संक्रमितका लागि आवश्यक संरचना निर्माणमा खेलेको भूमिका तथा मेलम्ची बाढीपीडितको उद्धार र पुनर्वासमा गरेको सक्रियता आज पनि नागरिकको मानसपटलमा ताजै छ। यही पृष्ठभूमिले अहिले उनको उम्मेदवारीलाई थप अर्थपूर्ण र सान्दर्भिक बनाएको छ।
वि।सं। २०३९ साल फागुन ७ गते चौतारा साँगाचोकगढी नगरपालिका–७, सानो सिरुवारीमा जन्मिएका दुलालले राजनीतिशास्त्रमा स्नातकोत्तर र अर्थशास्त्रमा स्नातक अध्ययन गरेका छन्। २०५१ सालदेखि संगठित राजनीतिक यात्रा सुरु गरेका उनी जनयुद्धकालीन कठिन समयमा बिग्रेड कमाण्डरको जिम्मेवारीमा रहे। संघर्षले परिपक्व बनाएको नेतृत्व क्षमता शान्ति प्रक्रियापछि संसदीय अभ्यासमा रूपान्तरण भयो। २०७४–२०७९ र २०७९–२०८२ माघसम्म दुई पटक बागमती प्रदेश सभा सदस्य निर्वाचित हुँदै उनले सामाजिक विकास मन्त्री र भौतिक पूर्वाधार विकास मन्त्रीको जिम्मेवारी सम्हाले। मन्त्री हुँदा सडक सञ्जाल विस्तार, विद्यालय तथा स्वास्थ्य संस्थाको स्तरोन्नति, खानेपानी तथा सिंचाइ आयोजना, सामाजिक सुरक्षा कार्यक्रम र विपद् पुनर्निर्माणमा उनले अघि सारेका योजनाहरू आज पनि उदाहरणका रूपमा प्रस्तुत गरिन्छन्। उनका कार्यकालमा सुरु भएका कतिपय पूर्वाधार योजनाले क्षेत्रीय विकासलाई दीर्घकालीन आधार दिएको स्थानीयको बुझाइ छ।
दुलालको नेतृत्व शैली सरल, संवादमुखी र जनतासँग प्रत्यक्ष जोडिएको छ। गाउँ–टोलमा पुगेर समस्या सुन्ने, सम्बन्धित निकायसँग समन्वय गर्ने र समाधानका लागि पहल गर्ने उनको अभ्यासले उनलाई “संकटमा साथ दिने नेता”को छवि दिएको छ। यही कारण अहिले प्रतिनिधि सभा सदस्यका रूपमा दिएको उम्मेदवारीप्रति क्षेत्रीय मतदातामा उत्साह र भरोसा देखिएको छ। घरदैलो कार्यक्रममा देखिएको व्यापक सहभागिता, आत्मीय स्वागत र सकारात्मक प्रतिक्रियाले उनको पक्षमा चुनावी माहोल बलियो बन्दै गएको संकेत गर्छ। राजनीतिक वृत्तमा विश्लेषण हुन थालेको छ कि विपत्तिमा देखाएको सक्रियता र विकासमा गरेको कार्यसम्पादनकै आधारमा उनी जितको नजिक पुगेका छन्।
यसपटकको उम्मेदवारीलाई दुलालले केवल चुनावी प्रतिस्पर्धा नभई सिन्धुपाल्चोक–२ को आवाज संघीय संसद्मा सशक्त रूपमा उठाउने अवसरका रूपमा लिएका छन्। क्षेत्रको दिगो पूर्वाधार विकास, विपद् व्यवस्थापनको स्थायी संरचना, रोजगारी सृजना, शिक्षा–स्वास्थ्य सुदृढीकरण र पारदर्शी शासन प्रणाली स्थापना उनका प्रमुख एजेन्डा रहेका छन्। “विपत्तिमा साथ, विकासमा गति” भन्ने प्रतिबद्धतासहित अघि बढेका दुलाल आफ्नो अनुभव, अध्ययन र जनसम्पर्कलाई संघीय तहमा रूपान्तरण गर्ने अठोटमा छन्। समग्रमा हेर्दा, उनको उम्मेदवारी केवल व्यक्तिगत राजनीतिक उकासो होइन, विगतका कामप्रतिको जनस्वीकृति र भविष्यप्रतिको आशाको प्रतीकका रूपमा उभिएको देखिन्छ। चुनावी मैदान तातिँदै जाँदा सिन्धुपाल्चोक–२ मा युवराज दुलालप्रति बढ्दो आकर्षणले आगामी परिणामलाई थप चासोको विषय बनाएको छ।
