‘पुष्पा २’ का अभिनेता अल्लु अर्जुन किन पक्राउ परे ?
काठमाडौं,२८ मंसिर । ‘पुष्पा २’ का अभिनेता अल्लु अर्जुनलाई हैदरावाद प्रहरीले सोधपुछपछि पक्राउ गरेको छ । केही समयअघि उनको घरमा प्रहरी पुगेको खबर आएपछि अभिनेतालाई कारमा प्रहरी चौकी लगिएको देखियो । अब प्रहरीले आफैंले अभिनेतालाई पक्राउ गरेको पुष्टि गरेको छ ।
वास्तवमा, चलचित्र रिलिज हुनुभन्दा एक दिन अघि प्रिमियर गरिएको थियो,जसमा अभिनेताको झलक पाउनका लागि फ्यानहरू आतुर भए र भागदौड मच्चियो । उक्त दुर्घटनामा एक महिलाको मृत्यु भएको थियो । यस विषयमा अल्लु अर्जुन विरुद्ध एफआईआर दर्ता भएको थियो ।
पुष्प २ रिलिज हुनुअघि डिसेम्बर ४ गते राति सन्ध्या थिएटरमा फिल्मको स्क्रिनिङ राखिएको थियो । जहाँ कलाकारलाई हेर्न ठूलो भीड लागेको थियो । त्यसपछि उनीहरुलाई नियन्त्रणमा लिन प्रहरीले लाठीचार्ज गरेपछि भागदौड मच्चिएको थियो । सो क्रममा रेवती भनिने ३५ वर्षीया महिलाको मृत्यु भएको थियो । दुर्घटनामा महिलाका १३ वर्षीय छोरा पनि घाइते भएका छन् र उनलाई अस्पतालमा भर्ना गरिएको छ ।
यसपछि प्रहरीले महिलाको परिवारले डिसेम्बर ५ मा दिएको उजुरीको आधारमा अल्लु अर्जुन, उनको सुरक्षा टोली र थिएटर व्यवस्थापनविरुद्ध मुद्दा दर्ता गरेको थियो । अभिनेतालाई भारतीय न्याय संहिता (बीएनएस) को धारा १०५ र ११८ (१) अन्तर्गत चिक्कडपल्ली पुलिस स्टेशनमा मुद्दा दायर गरिएको थियो।