म्यानमारमा आँधीले ५ सय भन्दा बढीको मृत्यु, ७७ जना बेपत्ता
एजेन्सी,२ असोज । म्यानमारमा गत हप्ता आएको यागी आँधी र वर्षापछि आएको बाढी र पहिरोका कारण २२६ जनाको मृत्यु भएको छ भने ७७ जना बेपत्ता भएका छन् । म्यानमारमा प्राकृतिक प्रकोपका कारण मृत्यु हुनेको संख्या ५ सय नाघेको छ । प्रभावित क्षेत्रमा सञ्चार संकटका कारण मृत्यु हुनेको संख्या गनिन ढिलो छ ।
भारतीय विदेश मन्त्रालयका प्रवक्ता रणधीर जैसवालले मंगलबार नौसेना र वायुसेनाले अपरेशन सद्भाव अन्तर्गत म्यानमारलाई सहायताको दोस्रो खेप पठाएको बताएका छन्। ३२ टन राहत सामग्रीसँगै १० टन रासन पठाइएको छ ।
म्यानमारमा बाढीका कारण छ लाखभन्दा बढी मानिस प्रभावित भएका छन् । म्यानमारमा पनि गृहयुद्ध चलिरहेको छ र सञ्चार समस्याका कारण मृत्यु हुनेको संख्या पत्ता लगाउने काम सुस्त छ । आसियान मानवीय सहायता समन्वय केन्द्रका अनुसार टाइफुन यागीले सर्वप्रथम भियतनाम, उत्तरी थाइल्याण्ड र लाओसलाई असर गरेको थियो। भियतनाममा ३ सय, थाइल्याण्डमा ४२ र लाओसमा ४ जनाको मृत्यु भएको छ ।