चर्चित रकगायक रोविन तामाङको शंकास्पद मृत्यु
![](https://nepalipen.com/wp-content/uploads/2023/07/Robin_Tamang_with_dog.jpg)
काठमाडौं, २० असार । चर्चित रकगायक रोविन तामाङको मृत्यु भएको छ । तामाङ आफ्नै घरमा मृत फेला परेका हुन् । अभिनेता समेत रहेका तामाङ बुढानिलकण्ठ–५ चिसेनीस्थित आफ्नै निवासमा मृत भेटिएका हुन् ।
तामाङकी दिदीले घरको कोठाभित्र भाइ रविन भएको र ढोकाभित्रबाट लक भएको भनी प्रहरीलाई खबर गरेकी थिइन् । प्रहरीले ढोका फोरेर हेर्दा तामाङ बेड नजिकै मृत अवस्थामा फेला परेका थिए । अहिले गायक तामाङको शव शिक्षण अस्पताल महाराजगन्जमा पोस्टमार्टमका लागि राखिएको छ । शव १० बजे पोष्टमार्टम हुने छ ।
नेपाली रक ब्याण्ड ‘रविन एन्ड लुज (रविन एन्ड दि न्यू रेभोलुसन)’का संस्थापक रविन फिल्म अभिनयमा जुटेका थिए । ‘जय पशुराम’, ‘बादशाह जुट’, ‘चिसो एष्ट्रे’, मुखौटा’, ‘छड्के’, ‘नाका’, ‘वान वे’ लगायत दर्जन बढी फिल्ममा अभिनय गरेका उनको पछिल्लो फिल्म ‘छड्के २’ केही अगाडि प्रदर्शनमा आएको थियो ।