अधिकारीका स्वकिय सचिवको बीच सडकमै गोली हानी हत्या
बुधबार राति भाजपा नेता शुभेन्दु अधिकारीका निजी सचिव चन्द्रनाथ रथको पश्चिम बंगालमा चलचित्र शैलीमा गोली हानी हत्या गरिएको छ। विधानसभा चुनावपछि हिंसाले तातेको बंगालमा भएको यो घटनाले फेरि राजनीतिक तरंग पैदा गरेको छ।
घटना उत्तर २४ परगना जिल्लाको मध्यग्राम क्षेत्रमा बुधबार राति करिब १०ः२० बजे भएको हो। विधानसभाको काम सकेर माइकलनगरस्थित घर फर्किरहेका रथमाथि बीच सडकमै आक्रमण भएको प्रहरीले जनाएको छ।
प्रत्यक्षदर्शीका अनुसार, रथ सवार एसयूभी दोहरियास्थित बिरयानी पसल नजिक पुग्नेबित्तिकै एउटा चारपाङ्ग्रे गाडीले बाटो छेक्यो। त्यसको केही सेकेन्डमै दुई मोटरसाइकलमा आएका चार हमलाकर्ताले कार घेरेर अन्धाधुन्ध गोली चलाए।
गोली रथको छाती र पेटमा लाग्यो। चालक बुद्धदेव बेरासमेत गम्भीर घाइते भए। स्थानीयले तत्काल अस्पताल पुर्याए पनि चिकित्सकले रथलाई मृत घोषित गरे। चिकित्सकका अनुसार उनको छातीमा लागेको दुई गोली घातक बनेको थियो।
आक्रमणपछि हमलाकर्ता हेलमेटबिनै फरार भएका थिए। अहिले प्रहरीले सीसीटीभी फुटेज खंगाल्दै हमलाकर्ताको पहिचान गर्ने प्रयास गरिरहेको छ। घटनामा प्रयोग गरिएको संदिग्ध सवारी साधन पनि प्रहरीले नियन्त्रणमा लिएको छ। प्रारम्भिक अनुसन्धानमा नम्बर प्लेटमा छेडछाड गरिएको आशंका गरिएको छ।
घटनापछि भाजपा कार्यकर्तामा तीव्र आक्रोश फैलिएको छ। सयौं समर्थक अस्पताल बाहिर जम्मा भएर सत्तारूढ All India Trinamool Congress विरुद्ध नाराबाजी गरेका छन्। भाजपा नेताहरूले यसलाई “सुनियोजित राजनीतिक हत्या” भन्दै दोष तृणमूल कांग्रेसमाथि थोपरेका छन्।
बंगाल भाजपा अध्यक्ष समिक भट्टाचार्यले भने, “यो तृणमूलबाट अपेक्षित हिंसा हो, उनीहरू नै जिम्मेवार छन्।” यता तृणमूल कांग्रेसले भने घटनाको निन्दा गर्दै अदालतको निगरानीमा सीबीआई अनुसन्धानको माग गरेको छ।
पूर्व वायुसेना कर्मचारीसमेत रहेका चन्द्रनाथ रथको हत्या भएपछि बंगालको राजनीति फेरि हिंसा र प्रतिशोधको बहसमा तानिएको छ।
