राष्ट्रिय स्वतन्त्र पार्टीका उम्मेदवारको उम्मेदवारी खारेज
धनुषा–१ मा ठूलो झट्का, कालोसूचीमा परेका किशोरी साह प्रतिस्पर्धाबाट बाहिर
काठमाडौं – निर्वाचन आयोगले धनुषा क्षेत्र नम्बर १ का राष्ट्रिय स्वतन्त्र पार्टी (रास्वपा) का उम्मेदवार किशोरी साहको उम्मेदवारी खारेज गरेको छ। बैंक तथा वित्तीय संस्थाको कालोसूचीमा नाम रहेको प्रमाणित भएपछि आयोगले यस्तो निर्णय गरेको हो।
आयोगका प्रमुख आयुक्त रामप्रसाद भण्डारीले कर्जा सूचना केन्द्रको अद्यावधिक विवरणका आधारमा साहको उम्मेदवारी अयोग्य ठहर गरिएको जानकारी दिएका छन्। विवरणअनुसार कमल निर्माण सेवा प्रालिका शेयरधनी रहेका किशोरी साह २०८० सालमा कालोसूचीमा परेको देखिएको छ।
त्यसैगरी, विभिन्न मितिमा एकल तथा संयुक्त रूपमा चेक बाउन्ससम्बन्धी प्रकरणमा समेत उनको नाम कालोसूचीमा सूचीकृत रहेको पाइएको आयोगको भनाइ छ। यही तथ्यलाई आधार मानेर उम्मेदवारी खारेज गर्ने निर्णय गरिएको हो।
यस निर्णयसँगै धनुषा–१ मा चुनावी प्रतिस्पर्धाको समीकरण बदलिएको छ। रास्वपाका लागि यो ठूलो धक्का मानिएको छ भने अन्य दलहरूका लागि नयाँ अवसर सिर्जना भएको राजनीतिक विश्लेषकहरू बताउँछन्।
अब रास्वपाले यस विषयमा कस्तो कदम चाल्छ र कानुनी उपचार खोज्छ कि खोज्दैन भन्ने विषयले थप चासो पाएको छ।