छोरीको कोर्ट म्यारिजपछि प्रहरीमाथि खनिए रास्वपा जिल्ला सभापति!
छोरीले कोर्ट म्यारिज गरिन्, बाबु रिसले रन्थनिए .आफ्नो इच्छाविपरीत भएको विवाह छुटाउन प्रहरीले सहयोग नगरेपछि राष्ट्रिय स्वतन्त्र पार्टीका एक जिल्ला सभापति सार्वजनिक कार्यक्रममै प्रहरी प्रमुखमाथि खनिएका छन्।
धनुषाका रास्वपा सभापति लक्ष्मेश्वर यादवले एसपी रुपेश खड्कालाई ‘घुसखोर’ र ‘दलाल’ जस्ता शब्द प्रयोग गर्दै गालीगलौज गरेका हुन्।
आइतबार आयोजित शुभकामना आदानप्रदान कार्यक्रममा यादवले प्रहरी प्रमुखमाथि आरोप लगाइरहँदा उपस्थित नेता–कार्यकर्ताले ताली बजाएको र सांसद मनिष झा हाँसिरहेको दृश्यसमेत सार्वजनिक भिडियोमा देखिन्छ।
तर, छोरीको विवाहको विषयमा सुरु भएको यो विवाद अहिले प्रहरी र राजनीतिक नेतृत्वबीचको आरोप–प्रत्यारोपमा परिणत भएको छ।
जिल्ला प्रहरी प्रमुख एसपी खड्काले भने यादवका आरोपलाई आपत्तिजनक, भ्रामक र तथ्यहीन भन्दै आपत्ति जनाएका छन्। उनले आफूमाथि लगाइएका आरोप पुष्टि गर्न चुनौतीसमेत दिएका छन्।
यादवले सामान्य झगडाका घटनामा आर्थिक लेनदेन गरेर प्रहरीले मुद्दा दर्ता गर्ने गरेको आरोप लगाए पनि त्यसको स्वतन्त्र पुष्टि भएको छैन।
अब प्रश्न उठ्छ—आखिर विवादको जड के हो
प्रहरीका अनुसार हंसपुर नगरपालिका–८ का यादवले असोज १७ गते परिवारकी एक महिला सदस्य हराएको भन्दै खोजतलासका लागि निवेदन दिएका थिए।
तर, अनुसन्धानका क्रममा ती महिला हराएको नभई काठमाडौँ जिल्ला अदालतबाट असोज ८ गते नै विवाहको नाता कायम गराइसकेको र असोज १४ गते आफ्नो पतिसँग गएको खुलेको प्रहरीको विज्ञप्तिमा उल्लेख छ।
प्रहरीका अनुसार विवाह गर्ने युवती २७ वर्षकी र युवक २३ वर्षका छन्। जात र आर्थिक अवस्थाका कारण यादवले विवाह स्वीकार नगरेको प्रहरीको भनाइ छ।
प्रहरीको दाबीअनुसार यादवले आफ्नो मञ्जुरीबिना विवाह भएको भन्दै सम्बन्धित व्यक्तिहरूलाई पक्राउ गरी विवाह छुटाइदिन दबाब दिएका थिए। उनले हजारौँ मानिस ल्याएर जिल्ला प्रहरी कार्यालय घेराउ गर्ने धम्की दिएको पनि विज्ञप्तिमा उल्लेख छ।
यद्यपि, यी विषयमा सम्बन्धित सबै पक्षको भनाइ र स्वतन्त्र पुष्टि आवश्यक छ।
छोरीको विवाहमा असहमति हुनु एउटा पारिवारिक विषय हो। तर, कानुनसम्मत विवाह छुटाउन प्रहरीमाथि दबाब दिन मिल्छ कि मिल्दैन
राजनीतिक पहुँचभन्दा माथि कानुन हुनुपर्छ। प्रहरीमाथि आरोप लगाइन्छ भने प्रमाण पनि प्रस्तुत हुनुपर्छ। अन्ततः यो विवादको निष्पक्ष छानबिन र कानुनी प्रक्रियाले नै सत्यको टुङ्गो लगाउनुपर्छ।
