वरिष्ठ पत्रकार अधिकारी र लामिछाने प्रेस काउन्सिलको सदस्य नियुक्त
काठमाडौं,१३ कात्तिक । वरिष्ठ पत्रकार विजयराज अधिकारी र केशवशरण लामिछाने प्रेस काउन्सिल नेपालको सदस्य नियुक्त भएका छन् । सञ्चार तथा सूचना प्रविधि मन्त्री पृथ्वीसुब्बा गुरुङको कात्तिक ९ गतेको मन्त्रीस्तरीय निर्णयबाट अधिकारी र लामिछाने सदस्य नियुक्त भएका हुन् । अधिकारी र लामिछानेले मंगलवार पद तथा गोपनियताको सपथ सहित जिम्मेवारी सम्हालेका छन् ।
प्रेस काउन्सिल ऐन, २०४८ को दफा ६ बमोजिम काउन्सिलमा १ जना अध्यक्ष र ९ जना सदस्य हुन्छन् । नेपाल सरकारले ४ वर्षका लागि नियुक्त गर्नसक्ने अध्यक्ष र सदस्यको नियुक्ति गर्ने व्यववस्था छ । नेपाल पत्रकार महासंघको अध्यक्ष पदेन–सदस्य, सूचना विभागका महानिर्देशक सदस्य–सचिव रहने गरी काउन्सिलको गठन हुन्छ ।
प्रेस काउन्सिल पत्रकार आचारसंहिताको पालनाबाट मर्यादित, जिम्मेवार पत्रकारिताको विकास गर्ने, प्रेस स्वतन्त्रताको संरक्षणका साथै नेपाल सरकार र सञ्चार माध्यमकाबिच पुलको रूपमा काम गर्ने जिम्मेवारी भएको संस्था हो ।
काउन्सिलका नवनियुक्त सदस्य अधिकारी को हुन ?
प्रेस काउन्सिल नेपालका नवनियुक्त सदस्य विजयराज अधिकारी २५ बर्षदेखि पत्रकारिता क्षेत्रमा कृयाशिल हुनुहुन्छ । २०३५ सालमा लमजुङको दुराडाँडाँमा जन्मनुभएका अधिकारी काठमाडौ टोखाका स्थायी वासिन्दा हुनुहुन्छ । अधिकारीले त्रिभुवन विश्वविद्यालयवाट पत्रकारिता तथा आमसंचार बिषयमा स्नातकोत्तर (एम।ए) उर्तिण गर्नुभएको छ । २०५६ सालदेखि पत्रकारितामा आवद्ध रहदै आउनुभएका अधिकारीले प्रधानमन्त्री शेरबहादुर देउवाको विज्ञ समुहमा रहेर (२०७८ असार २९ देखि २०७९ पुष ११ सम्म) काम गर्नुभएको थियो ।
कान्तिपुर टेलिभिजनको समाचार कक्षमा १८ वर्ष काम गर्नुभएका अधिकारीले जिल्ला व्युरो प्रमुख र चर्चित कार्यक्रम फायर साइडको प्रोड्युसरको जिम्मेवारी समेत सम्हाल्नुभएको थियो । अधिकारीले एक बर्ष ग्लोब नेपाल डटकमको प्रधान सम्पादक रहेर काम गर्नुभएको थियो । लमजुङको पहिलो सामुदायिक रेडियो मरस्याङदीका संस्थापक रहनुभएका अधिकारी इमान्दार र स्वच्छ छविका पत्रकार हुनुहुन्छ ।
स्पष्ट वक्ता रहेका अधिकारी पत्रकारिताको अध्यापक तथा प्रशिक्षक समेत हुनुहुन्छ । विभिन्न सामाजिक संघ सस्थामा संलग्न अधिकारीले केहि समय नेपाल अपांग संघ खगेन्द्र नवजीवन केन्द्रको निर्देशकको जिम्मेवारी समेत वहन गरि प्रशासनिक अनुभव प्रप्त गर्नुभएको छ । अधिकारीले विभिन्न राष्ट्रिय तथा अन्तराष्ट्रिय पुरस्कार र सम्मान समेत प्राप्त गर्नुभएको छ ।