भारतको सहयोगमा निर्माण हुने दार्चुलाको गलैनाथ मावि भवनको शिलान्यास
काठमाडौं, ६ वैशाख । भारत सरकारको सहयोगमा निर्माण हुने दार्चुलाको गलैनाथ मावि भवनको शिलान्यास गरिएको छ । बिहिबार शैल्यशिखर नगरपालिकाका मेयर बिजय सिंह धामी र भारतीय राजदूतावास, काठमाडौंका द्वितीय सचिव प्रशान्त कुमार सोनाले उक्त भवनको शिलान्यास गरेका हुन् ।
नेपाल–भारत विकास सहकार्य अन्तर्गत भारत सरकारको २ करोड ७३ लाख आर्थिक सहयोगमा निर्माण हुने शैल्यशिखर नगरपालिकास्थित उक्त विद्यालयबाट त्यहाँ अध्ययनरत विद्यार्थी लाभान्वित हुने जनाइएको छ ।
शिलान्यास कार्यक्रममा राजनीतिक प्रतिनिधि, सरकारी अधिकारी, समाजसेवी, विद्यालय व्यवस्थापनका प्रतिनिधि, शिक्षकरशिक्षिका, अभिभावक तथा विद्यार्थीहरुको पनि उपस्थिति रहेको थियो ।
विद्यालयलाई आवश्यक अन्य सुविधासँगै दुई तल्ले विद्यालय भवन, शौचालय, कार्यालय भवनको निर्माण र फर्निचरमा उपयोग गरिने जनाइएको छ । भारत सरकार र नेपाल सरकारबीच भएको सम्झौता अन्तर्गत यस परियोजनालाई उच्च प्रभाव सामुदायिक विकास परियोजनाको रुपमा अघि बढाइने र दार्चुलाकोे शैल्यशिखर नगरपालिकामार्फत कार्यान्वयन गरिने उल्लेख छ ।
कार्यक्रममा शैल्यशिखर नगरपालिकाका मेयरले प्राथमिकताका क्षेत्रमा नेपाली जनताको उन्नतिका लागि भारत सरकारले पुर्याउदै आएको निरन्तर विकास सहयोगको प्रशंसा गरे ।
दार्चुलाको शैल्यशिखर नगरपालिकास्थित श्री गलैनाथ माध्यमिक विद्यालयमा अध्ययनरत विद्यार्थीहरुका लागि गुणस्तरिय शिक्षा प्रदान गर्न विद्यालयको नयाँ भवन उपयोगी हुनुका साथै यसले सिकाइका लागि राम्रो वातावरण सिर्जना गर्ने उल्लेख छ ।
