बन्दिपुर गाउँपालिकाको अर्को उत्कृष्ट काम : दुना टपरी बनाउने मेसिन हस्तान्तरण,बजारिकरणमा सहजिकरण गर्ने
काठमाडौं, २२ साउन । तनहुँको बन्दिपुर गाउँपालिकाले एक पछि अर्को गर्दै जनमुखि काम गर्दै आइरहेको छ । आइतबार गाउँपालिकाले वडा नम्बर ६ धरमपानीमा दुना टपरी बनाउने र प्याकेजिड गर्ने मेसिन हस्तान्तरण गरेको छ ।
गाउँपालिकाका अध्यक्ष सुरेन्द्र थाापाले उक्त मेसिन कन्या देबि आमा समूहलाई हस्तान्तरण गरेका हुन् । आमा समुहले उत्पादन गर्ने दुना टपरी होटल तथा रेस्टुराँ व्यवसायीहरुलाई दिने योजना गाउँपालिकाको योजना रहेको छ ।
गाउँमा उत्पादित तिल,बोडी, फापर,गहत,मास,जुनेलो, कोदोको पिठो, गुन्द्रुक,मसेउरा, खुर्सानी,थांकल लगायतका नगदेबाली प्याकेजिङ्ग गरि बजारिकरण मा गाउँपालिकाले सहयोग गर्ने अध्यक्ष थापाले बताउनु भयो । समग्र ६ नं वडाका जनताको आर्थिक स्थिति मजबूत बनाउने आफ्नो योजना रहेको उहाँको भनाइ छ ।
केही समयअघिसम्म गाउँपालिकाको नेतृत्वको निकै आलोचना हुँदै आएको थियो । पछिल्लो समय अध्यक्ष थापा आफै पनि जनतासँगै फिल्डमा देखिन्छन् र उनीहरुसँगै काम पनि गर्छन् । वर्खायामको झरी पनि नभनी थापाले कुलो,बाटो खन्दै स्थानीय स्तरकै खाजा खाँदै कामको आनन्द लिइरहेका छन् ।
