तस्कर समूहले २ महिनामा २२ पटक कारोबार गरेको खुलासा : २ हजार किलोभन्दा बढी सुन तस्करी भएको अनुमान
काठमाडौं, ५ साउन । सुन तस्करले बिल्कुल नयाँ तरिका अपनाएर सुन तस्करी गरेको पाइएको छ । बुधबार राजस्व अनुसन्धान विभागले भन्सार चेक भएर बाहिरिन लाग्दै गर्दा १ सय ५५ केजीभन्दा बढी तौलको सुन पक्राउ गरेपछि यो प्रकरणको जालो उच्च तहसम्म नै रहेको अनुमान गरिएको छ ।
विभागले मोटरसाइकल र स्कुटरको ‘ब्रेक सु’भित्र लुकाएर ल्याएको सुन बरामद भएपछि सुन तस्करीको नयाँ शैली खुलेको हो । सुनमा कालो पदार्थले लेपनसमेत गरिएको थियो ।
विभागका अनुसन्धान अधिकृतले अनुसन्धान गर्दा सो सुनको कारोबार रेडी ट्रेड प्राइभेट लिमिटेडमार्फत हुँदै आइरहेको पाइएको छ । विभागको विशेष टोलीले रेडी ट्रेडका सञ्चालक दिलिप भुजेल र अन्य दुई जनालाई नियन्त्रणमा लिइसकेको छ ।
प्रारम्भिक अनुसन्धानमा यसअघि पनि पटक–पटक रेडी ट्रेडले ब्रेक सु आयात गरेको खुलेको छ । त्रिभुवन विमानस्थल भन्सारबाट दुई महिनामा करिब २२ पटक यस्तै ‘ब्रेक सु’ आयातपछि सुरक्षा जाँच गरेर लगेको देखिएको स्रोतले बतायो । यो प्रकरणमा केही व्यावसायिक घराना र राजनीतिक नेतृत्वसमेत मुछिएको हुन सक्ने विभागका अधिकारीहरूको आशंका छ ।
विभागले गरेको अनुसन्धानका आधारमा दुई महिनाको अवधिमा झण्डै २२ अर्ब मूल्य बराबरको २२ क्विन्टल सुनको तस्करी भएको अनुमानसमेत गरिएको छ ।
अनुसन्धान अधिकृतहरूका अनुसार दुई महिनाको अवधिमा आयात गरिएका ती ब्रेक सुहरू कहाँ गए भन्ने बारेमा समेत गहन अध्ययन आवश्यक देखिएको छ ।
यो घटना र विगतको प्रकृति हेर्दा यसअघि पनि अहिलेकै शैलीमा सुन तस्करी भएको अनुमान सहजै गर्न सकिने विभागका एक अनुसन्धान अधिकृतले बताए । अनुसन्धान अधिकृतहरूले २ महिनाको अवधिमा भएका यस प्रकारका आयातको बारेमा समेत गम्भीर अनुसन्धान गरिने जानकारी दिए । उनले भने– ‘यसअघि ब्रेक सु भनेर आयात हुँदा पनि आजजस्तै तरिका अपनाएको हुन सक्छ र हरेक पटकमा १०० किलोका दरले ब्रेक सु आएको हुन सक्छ ।’
यसरी विगतमा पनि सुन नै तस्करी गरिएको भए २ हजार किलोभन्दा बढी सुन दुई महिनाको अवधिमा तस्करी भएको हुनसक्ने ती अधिकृतको दाबी छ । समाचारपत्र