सोरसबाट चलाइएको संस्थाहरुले युएसएआइडीबाट पनि रकम पाएको खुलासा
एजेन्सी, २० चैत्र । जर्ज सोरसबाट चलाइएका संस्थाले युएसएआइडीबाट पनि रकम पाएको खुलासा भएको छ । भारतको अनुसन्धान निकाय इडीले त्यस्ता संस्थाबाट अध्ययन गर्न त्यस्तो तथ्य पत्ता लगाएको हो ।
टाइम्स अफ इन्डियाका अनुसार इडीले बैंगलुर केन्द्रित कम्पनीमाथि विदेशी मुद्रा अपचलनमा छानविन गरिरहँदा सोरस इकोनोमिक डेभलपमेन्ट फन्डमा २५ करोड भारु पुगेको तथ्य पत्ता लागेको हो ।
जसमध्ये एएसएआर सोसल इम्प्याक्ट एडभाइजरले मात्र युएसएआइडीबाट ८ करोड भारु प्राप्त गरेको खुलेको छ । छानविनमा परेका तीन कम्पनीले सोरसबाट २०२१ देखि २०२४ बीच अनुदान पाएका थिए ।
एएसएआरमा पुगेको रकम फेरि दिल्ली केन्द्रित पोलिसी थिंक ट्यांक काउन्सिल अफ इनर्जी, इन्भाइरोमेन्ट र वाटर सीइइडब्लुमा पुगेको भेटिएको छ । उक्त संस्थामा योजना आयोगमा रहिसकेका भारतका प्रभावशाली व्यक्तिहरु पनि ट्रस्टिजका रुपमा छन् । सोरसले चलाएका संस्थामा युएसएआइडी समेत जोडिएपछि चासो बढेको छ ।
डोनाल्ड ट्रम्प राष्ट्रपति बनेपछि युएसएआइडी बन्द गराइएको छ । उक्त संस्थाले उदारवादका नाममा जथाभावी रकम बाँडेर अनियमितता गरेको आरोप ट्रम्पले नै लगाएका छन् । सोरस र युएसएआइडीको गहिरो हिमचिमका घटनाहरु एकपछि अर्को आइरहेका छन् । यसबारे विश्वका धेरै देशहरुमा छानविन चलिरहेको छ ।