चौधरी पूँजी पलायनमा, अरबौंको लगानी धरापमा
काठमाडौं, २५ मंसिर । नेपालका एकमात्र डलर अर्बपति बिनोद चौधरीको चौधरी ग्रुपले देशलाई हरेक वर्ष कति तिर्यो भनेर सोध्दा लाजमर्दो नै छ । देशलाई बढी कर तिर्ने सूचीमा उनी निकै तल पर्छन् । उनले देशमा प्रकोप हुँदा कति सहयोग गर्छन् भनेर सोध्यो भने भन्नै लाजमर्दो छ । भूकम्प आउँदा उनले सरकारी कोषमा आर्थिक सहयोग गरेनन् ।
चौधरीको नाम त ठूलो छ तर कतिलाई रोजगारी दिइरहेका छन् भनेर सोध्दा त्यो निकै सानो संख्यामा छ । भएकालाई पनि चौधरीले कटौती गरिरहेका छन् । तर, चौधरी कर छली देखि देशको रकम विदेश गैरकानूनी तरिकाले लाने क्रियाकलापमा घूस दिनेमा अगाडि गनिन्छन् ।
नेता देखि कर्मचारीलाई प्रभावित पारेकाले चौधरीको कर छली सामसुम पारिन्छ । उनले नबिल बैंकबाट विदेशमा खडा गरेको कृत्तिम कम्पनीको भन्दै पूँजी पलायन गराइरहेका छन् । हरेक वर्ष ठूलो परिमाणमा रकम विदेश पुर्याउँछन् ।
अहिले चौधरीले बैंकहरुको लगानी नै धरापमा पारदिएका छन् । सम्राट सिमेन्टमा चौधरीको ठूलै चलखेल देखिएको छ । साझेदार विभिन्न १० बैंहरुलाई डुबाउने खेलमा चौधरी लागेका छन् । अनिल रुङ्गटा समूह चौधरीलाई साथ दिइरहेको छ । ४५ प्रतिशत शेयर चौधरी र रुङ्गटा समूहले किन्ने सम्झौता असार १३ गते भएपछि सिमेन्ट उद्योग नै बन्द गरिदिए ।
हिसाब नमिलेको भन्दै चौधरीले किचलो झिकेपछि सिमेन्ट उद्योग बन्द मात्र भएन अन्य लगानीकर्ताहरु कालो सूचीमा पर्ने जोखिममा छन् । १३ अर्ब रुपैयाँको बैंकहरुको लगानी नै धरापमा परेको छ अहिले । उद्योग बन्द भएपछि १ अर्ब घाटा परेको र त्यो कस्ले व्यहोर्ने भन्ने विवाद चलेको छ ।
चौधरीले नेपालमा जे जति कारोबारहरु गरे ती धमाधम असफल हुँदै गएका छन् । चाउचाउमा पनि उनले भविष्य देख्न छाडेका छन् । सिमेन्टमा उभो नलाग्ने देखेपछि टेलिकम क्षेत्रमा चलखेल गर्न खोजिरहेका छन् ।
टेलिकममा चौधरीले टर्कीबाट विदेशी कम्पनी ल्याउने र चीनको हुवाबेसँग मिलेर काम गर्ने कसरत बढाइरहेका छन् । उनको नयाँ कदमलाई अर्थपूर्ण मानिएको छ ।
