आगामी दिनमा चीनबाट अझ धेरै पर्यटकको आगमन हुने विश्वास
काठमाडौं, फागुन १२ गते संस्कृति,पर्यटन तथा नागरिक उड्डनमन्त्री बद्री पाण्डेले आगामी दिनमा चीनबाट अझ धेरै पर्यटकको आगमन हुने र त्यसले नेपाल–चीन पर्यटन सहकार्य थप घनिष्ट र प्रगाढ हुने विश्वास व्यक्त गर्नुभएको छ ।
नेपाल भ्रमणमा रहनुभएका चिनियाँ जातीय मामिलामन्त्री पेन यू नेतृत्वको प्रतिनिधि मण्डलसँग सोमबार मन्त्रालयमा भएको शिष्टाचार भेटवमा सो कुरा बताउनु भएको हो । चिनियाँ टोलीलाई स्वागत गर्दै मन्त्री पाण्डेले सन् १९५५ मा स्थापित कूटनीतिक सम्बन्धले यस वर्ष ७० औँ वर्ष पूरा गर्न लागेकोमा प्रति खुसी व्यक्त गर्नुभयो । मन्त्री पाण्डेले भन्नुभयो, यहाँहरुको नेपाल भ्रमणबाट दुई देशको आपसी हितका साथै दुई देशका मन्त्रालयबीचको सहयोगको आदानप्रदान हुने विश्वास मैले लिएको छु ।
उहाँले नेपालको पर्यटनको विकासका लागि चिनियाँ राजदूतसँग पटक पटक छलफल गरेको उल्लेख गर्दै अगाडि भन्नुभयो, दुई देशबीच कूटनीतिक सम्बन्ध स्थापना भएको ७०औँ वर्षको उपलक्ष्यमा चीन सरकारले सन् २०२५ लाई नेपाल भ्रमण वर्ष मनाउने घोषणा गरेको छ म त्यसका सह्र्रना गर्दछु । मन्त्री पाण्डेले नेपाल एक चीन नीति प्रति प्रतिवद्ध रहेको र आगामी दिनहरूमा चीनबाट अझ धेरै पर्यटकको आगमनले नेपाल चीन पर्यटन सहकार्य थप घनिष्ट र प्रगाढ हुनेमा पनि आफू आशावादी भएको बताउनुभयो ।
त्यस्तै पर्यटनमन्त्री पाण्डेले नेपाल एयरलाइन्सले गोन्जाव र नेपाल सिधा उडानका लागि प्रयास गरिरहेको र हिमालय एयरलाइन्सले पोखरादेखि ल्हासासम्मको उडान गर्ने तयारी गरीरहेको बताउनुभयो । उहाँले नेपालको भाषा,संस्कृति,कलाका बारेमा अध्ययन गर्नका लागि समेत चिनियाँहरुलाई आव्हान समेत गर्नु भयो । त्यसैगरी भेटको अवसरमा चिनियाँ मन्त्री पेन यूले यस अघिका दुई देशका राष्ट्राध्यक्षबीच भएको सम्झौतालाई कार्यान्वयन गर्दै जानु पर्नेमा जोड दिनुभयो ।
उहाँले भन्नुभयो, चिनियाँ कम्युनिष्ट पार्टीले नयाँ पार्टीले ल्याएका विचारधारा र परम्परागत विचारधारालाई एक अर्कामा आदानप्रदान र शान्तिपूर्ण विकासतर्फ लागिरहेको छ । उहाँले भन्नुभयो अल्पसंख्यक जातिहरुलाई सम्मान गर्दै कला संस्कृति झल्किने खालका म्युजिम निर्माण गरिरहेका छौं । नेपाल गौतम बुद्धको जन्मस्थल भएको उल्लेख गर्दै उहाँले चीनमा १० करोड बढी बुद्ध धर्म मान्नेरहेको उल्लेख गर्नुभयो ।
उहाँले बुद्ध धर्मलाई आदर्श मानेर अघि बढ्न समेत अनुरोध गर्नु भयो । उहाँले आफ्नो मन्त्रालय मातहतमा ३० वटा विश्वविद्यालय रहेको उल्लेख गर्दै एउटा विश्व विद्यालयलाई नेपालको र्सास्कृति महोत्सवका बारेमा बुझ्न पठाउने समेत प्रतिवद्धा व्यक्त गर्नुभयो ।