विपिन जोशी जिवितै, हमासले अज्ञात स्थानमा राखेको खुलासा
काठमाडौं, २० मंसिर । नेपाली युवा विपिन जोशी हमास लडाकुको नियन्त्रणमा जिवितै रहेको खुलासा भएको छ । नेपालका लागि इजरायलका राजदूत श्मुलिक एरी बासले यसबारे बिहिबार जानकारी गराएका हुन् ।
राजदूत बासले पत्रकार सम्मेलनमा अरब स्रोतको भनाई उदृत गर्दै विपिन जोशी जिवितै रहेको तर कहाँ छन् भन्ने जानकारी नभएको बताए । हमासले अझै एक सयभन्दा बढी इजरायली र विदेशी नागरिकलाई नियन्त्रणमा राखेको छ ।
७ अक्टोबर २०२३ मा हमास लडाकुले इजरायलमा आक्रमण गरी ठूलो संख्यामा इजरायली र विदेशी नागरिकको हत्या गरी अपहरण समेत गरेको थियो । १० कृषि विषयका नेपाली विद्यार्थीको क्रुर हत्या गरेका थिए । विपिन जोशीको भने अपहरण भएको थियो ।
नेपाली विद्यार्थीहरु अर्न एण्ड लर्न परियोजनामा इजरायल गएका थिए । जसमध्ये विपिन पनि थिए ।
१० नेपाली विद्यार्थीको क्रुर हत्या गर्ने र विपिन जोशीको अपहरण गर्ने हमासको विरोध गर्नुपर्नेमा नेपालमा भने केही समूह र संस्था उसलाई लाभ हुने गरी जुलुस निकाल्छन् । प्यालेस्टाइनको पक्षमा भन्दै उनीहरु हमासको पक्षमा अन्तर्राष्ट्रिय माहोल तयार गर्न खोज्छन् ।