चाडपर्व बिर्सेर सुरक्षा व्यवस्थापनमा खटिन्छन् महानगर प्रहरी–बालेन्द्र शाह
काठमाडौं, १४ भदौ । काठमाडौँ महानगर प्रहरी बलले भदौ १४ गते राष्ट्रिय सभागृहमा ३३ औँ महानगर प्रहरी दिवस सम्पन्न गरेको छ । कार्यक्रममा काठमाडौँ महानगरका प्रमुख, उपप्रमुख र प्रमुख प्रशासकीय अधिकृतलगायतको उपस्थिति रहेको थियो। उक्त कार्यक्रममा काठमाडौं महानगरपालिकाका प्रमुख बालेन्द्र शाहले ‘सांस्कृतिक सहरः समृद्ध महानगर’ बनाउन महानगर प्रहरीको महत्वपूर्ण योगदान गरेको बताउनु भएको थियो ।
काठमाडौं महानगर उपप्रमुख सुनिता डंगोलले जनमानससँग प्रत्यक्ष रूपमा जोडिने निकाय प्रहरी बल भएको बताउनुभयो। उहाँले भन्नुभयो “नागरिकको सुख–दुःख, मौलिक जात्रा, पर्व, संस्कार–संस्कृतिमा रमाइरहँदा त्यसको सुरक्षा व्यवस्थापनमा खटिने महानगर प्रहरी भने आफ्नै चाडपर्व मनाउनबाट वञ्चित रहनुपर्छ। त्यसैले महानगर प्रहरी बलको भूमिका अत्यन्त महत्वपूर्ण छ।”
काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक टेकबहादुर तामाङले नेपाल प्रहरीले महानगर प्रहरी बलसँग धेरै क्षेत्रमा सहकार्य गरेको बताउनुभयो। उहाँले भन्नुभयो – “महानगर प्रहरी स्थापना हुनु अघि नेपाल प्रहरीलाई धेरै गाह्रो थियो। सबै क्षेत्रमा खटिन सक्ने अवस्था थिएन। तर अहिले अधिकांश कार्यमा महानगर प्रहरीको सहकार्यले सहज भएको छ।”