काठमाडौं र किर्तिपुर जोड्ने मितेरी पुल उद्घाटन
काठमाडौं,१४ शनिबार । काठमाडौं महानगरपालिकाको वडा नं १४ शान्तिनगर र कीर्तिपुर नगरपालिका वडा न.१ र २ लाई जोड्ने मितेरी पुलको उद्घाटन भएको छ ।
शनिबार एक कार्यक्रमकाबिच बल्खु खोलामा निर्मित सो पुलको उद्घाटन १४ नं वडाका अध्यक्ष सुमन श्रेष्ठले गरेका हुन् ।
श्रेष्ठका अनुसार १४.३५ मिटर लम्बाई र १.२९ मिटर चौडाइको उक्त पुल ८ लाख ९१ हजारमा निर्माण भएको हो ।
नवनिर्मित पुलले काठमाडौंको वडा नं १४ का शान्तिनगर र किर्तिपुरको १ र २ वडाका धेरै स्थानलाई जोड्नेछ । पुल सञ्चालनपछि शान्तिनगर र किर्तिपुरका स्थानीय लाभान्वित हुनेछन् ।
कार्यक्रममा वडाध्यक्ष श्रेष्ठले पुल निर्माणपछि स्थानीयहरुलाई सहज हुने विश्वास व्यक्त गरे । “जनताको आवश्यकता पुरा गर्न पुल निर्माण गरेका हौं, पुल निर्माण सहर विकासको सूचक पनि हो ।”–श्रेष्ठले भने । उनले पुल निर्माण सम्पन्न गर्न सहयोग गर्ने सबैलाई धन्यवाद दिए ।
उद्घाटन कार्यक्रममा तिन वटै वडाका स्थानीयहरु, बृद्धिजीविहरु, समाजसेवीहरु, काठमाडौं वडा नं १४ का वडा सदस्यहरु अच्युत सापकोटा, नविन नकर्मी, महिला सदस्य शोभा कार्की खड्का, दलित महिला सदस्य अनिता नेपाली,वडा सचिव जयदेव घिमिरे, इन्जिनियर कविन्द्रराज नकर्मीलगायतको उपस्थिति थियो ।
