इजरायली हवाई आक्रमणमा हमासका ठुला नेता श्रीमतीसहित मारिए
एजेन्सी । इजरायली हवाई आक्रमणमा हमासका शीर्ष राजनीतिक नेता सलाह अल–बर्दाविल र उनकी श्रीमतीको मृत्यु भएको छ। हमासले आइतबार बिहान यसको पुष्टि गरेको छ। यो आक्रमण दक्षिणी गाजाको खान युनिस शहरमा भएको थियो।
इजरायलले शनिबार राति लेबनानका धेरै ठाउँमा हवाई आक्रमण गरेको छ। यी आक्रमणहरूमा ७ जनाको मृत्यु भएको छ। लेबनानबाट प्रहार गरिएको रकेटको जवाफमा इजरायलले यो आक्रमण गरेको हो। विगत ४ महिनादेखि चलिरहेको हिजबुल्लाहसँगको युद्धविरामपछि इजरायलको यो पहिलो ठूलो आक्रमण थियो।
हिजबुल्लाहले एक विज्ञप्ति जारी गर्दै इजरायलमा रकेट प्रहार नगरेको र युद्धविरामको पालना गरिरहेको बताएको छ। इजरायली सेना (आईडीएफ) ले लेबनानी सीमा नजिकै रहेको मेटुला शहरबाट छ वटा रकेट प्रहार गरिएको बताएको छ। यी मध्ये ३ वटा इजरायलमा प्रवेश गरे र हावामै नष्ट भए।
गत हप्ता मंगलबार, इजरायलले युद्धविराम तोड्यो र गाजामा फेरि आक्रमण सुरु गर्यो। यी आक्रमणहरूमा लगभग ६०० प्यालेस्टिनीहरूको मृत्यु भइसकेको छ। इजरायली सेनाले गाजा शहरका तीन क्षेत्रमा नयाँ आक्रमणको योजना बनाइरहेको बताएको छ र प्यालेस्टिनीहरूलाई त्यहाँबाट जान चेतावनी दिएको छ।
रकेट आक्रमणको प्रतिक्रियामा, इजरायली प्रधानमन्त्री बेन्जामिन नेतान्याहूले सेनालाई लेबनानमा बदला लिन आग्रह गरेको टाइम्स अफ इजरायलले रिपोर्ट गरेको छ। यसका लागि दर्जनौं स्थानहरूलाई लक्षित गर्न आदेश दिइएको छ।
यसैबीच, लेबनानका प्रधानमन्त्री नवाफ सलामले पनि सेनालाई आवश्यक कारबाही गर्न आग्रह गरेका छन्। यद्यपि, नवाफले देश फेरि युद्ध चाहँदैन भन्ने कुरा स्पष्ट पारे । लेबनानको सरकारी समाचार एजेन्सी एनएनएका अनुसार दक्षिणी लेबनानको तौलिन गाउँमा इजरायली आक्रमणमा एक बालकसहित पाँच जनाको मृत्यु भएको छ भने १० जना घाइते भएका छन्।