रुसको निजी सैन्य समूह वाग्नर प्रमुखको रहस्यमय विमान दुर्घटनामा मृत्यु
एजेन्सी, ७ भाद्र । रुसको निजी सैनिक समूह वाग्नरका प्रमुख इभगेनी प्रिगोजिनको रहस्यमय विमान दुर्घटनामा मृत्यु भएको छ । निजी विमानमा सवार प्रिगोजिनसहित १० जना घटनामा मारिएका छन् ।
विमान के कारणले दुर्घटना भयो भन्नेबारे यकिन नभएपनि खसालिएको आशंका छ । दुई महिना अघि उनीमाथि विद्रोह गरी रुसको सत्ता कब्जा गर्न खोजेको आरोप थियो ।
केही दिनअधिमात्र प्रिगोजिनले अफ्रिकामा रहेर भिडियो सन्देश दिएका थिए । उनले रुसलाई अझ महान बनाउने र अफ्रिकालाई अझ मुक्त क्षेत्र बनाउने बताएका थिए ।
कतिपयले घटनामा रुसी राष्ट्रपति भ्लादिमिर पुटिनमाथि औंला तेर्साएका छन् । पुटिनले हवाई सैनिक प्रमुख परिवर्तन गरेको केही दिनमा घटना भएकोले आशंकामा बल पुगेको हो ।
रुसी समाचार संस्थाले घटनाको छानविन गरिने समाचार प्रकाशन गरेका छन् । प्रिगोजिनको मृत्युले वाग्नरको नेतृत्व कस्ले लिने भन्ने चासो बढेको छ ।