बद्री अर्यालद्धारा लिखित दुइ पुस्तकको संयुक्त विमोचन सम्पन्न
काठमाडौं, असोज १६ — जय नेपाल फाउन्डेशनको आयोजनामा राष्ट्रिय सभागृह, प्रदर्शनी मार्ग, काठमाडौंमा बद्री अर्यालद्वारा लिखित ‘समृद्ध नेपालको आर्थिक दिग्दर्शन’ र ‘समृद्ध नेपालको राजनीतिक दिग्दर्शन’ दुई पुस्तकको संयुक्त विमोचन समारोह सम्पन्न भएको छ।
कार्यक्रममा नेपाली कांग्रेसका महामन्त्री प्रदिप पौडेलले बद्री अर्यालसँगको मित्रताको चर्चा गर्दै राजनीतिक यात्रामा लामो समयको सहयात्री रहेको उल्लेख गर्नुभयो।पुस्तक लेखन प्रकाशन गरेकोमा खुसी व्यक्त गर्दै आगामी दिनमा यस्ता लेखन प्रकाशनको निरन्तरताको कामना समेत गर्नुभयो।
पुस्तकको समीक्षा गर्दै नेकपा (एमाले) का नेता तथा पूर्व अर्थमन्त्री सुरेन्द्र पाण्डेले ‘समृद्ध नेपालको आर्थिक दिग्दर्शन’ समृद्ध नेपाल निर्माणका लागि आवश्यक आर्थिक आधार, सोच र दृष्टिकोण निर्माणमा महत्वपूर्ण योगदान दिन सक्ने पुस्तकका रूपमा चर्चा गर्नुभयो। उहाँले मुलुकलाई समृद्ध बनाउने विषयमा पर्याप्त आधार प्रस्तुत गर्ने यस पुस्तकको अध्ययन आवश्यक रहेको उल्लेख गर्दै विशेषगरी राजनीतिकर्मीहरूले आफ्नो आर्थिक दृष्टिकोण निर्माण गर्न पुस्तकले महत्वपूर्ण सहयोग पुर्याउने बताउनुभयो।
त्यसैगरी वरिष्ठ पत्रकार पुरुषोत्तम दाहालले ‘समृद्ध नेपालको राजनीतिक दिग्दर्शन’ माथि समीक्षा गर्दै राजनीतिक यात्रामा प्रवेश गर्न चाहने नयाँ पुस्ताका लागि पुस्तक उपयोगी रहेको बताउनुभयो। उहाँले राजनीतिक दलभित्र नेतृत्वको भूमिका, कार्यकर्ताको जिम्मेवारी, दलको वैधानिकता, राजनीतिक आचरण, इमानदारिता तथा राजनीतिक दृष्टिकोण निर्माणजस्ता विषयलाई पुस्तकले गम्भीर रूपमा उठाएको उल्लेख गर्नुभयो। राजनीतिको अर्थ, उद्देश्य र दलभित्रको जिम्मेवारी बुझ्न चाहनेहरूका लागि पुस्तक अध्ययनयोग्य रहेको उहाँको धारणा थियो।
वरिष्ठ साहित्यकार नमराज लम्सालले दुवै पुस्तकको समीक्षा गर्दै लेखकको लेखन र पुस्तकको प्रस्तुति पक्षको प्रशंसा गर्नुभयो। उहाँले पुस्तकलाई सिर्जनात्मक र विशिष्ट लेखनका रूपमा चर्चा गर्दै यसको प्रकाशनका लागि लेखकलाई धन्यवाद दिनुभयो। साथै, मुलुकको समृद्धि, राजनीति र अर्थतन्त्रका विषयमा चासो राख्ने सम्पूर्ण नागरिकका लागि दुवै पुस्तक पठनीय रहेको उहाँले बताउनुभयो।
तीस वर्ष मुनिकी अधिवक्ता एवं स्वर्ण पदक विजेता राष्ट्रिय खेलाडी करिना पुरीले नयाँ पुस्तालाई लक्षित गर्दै पुस्तकको अध्ययनको आवश्यकता औँल्याउनुभयो। उहाँले विशेषगरी युवा तथा नयाँ पुस्ताले मुलुक निर्माणका विषयमा आफ्नो धारणा र दृष्टिकोण निर्माण गर्न यस्ता पुस्तक अध्ययन गर्नुपर्ने बताउँदै दुवै पुस्तकमा प्रस्तुत विषयवस्तु र लेखनको प्रशंसा गर्नुभयो। पुस्तकले नयाँ पुस्तालाई राष्ट्र निर्माणप्रति सोच्न र जिम्मेवारीबोध गर्न प्रेरित गर्ने सन्देश दिएको भन्दै उहाँले लेखकलाई धन्यवाद दिनुभयो।
पुस्तकका प्रकाशक हरि पराजुलीको अध्यक्षतामा भएको उक्त कार्यक्रममा जय नेपाल फाउण्डेसनका संस्थापक सदस्य तथा अधिवक्ता प्रकाश रावलले स्वागत मन्तव्य राख्नु भएको थियो।कार्यक्रममा वक्ताहरूले नेपाल निर्माण र समृद्धिको बहसलाई केवल राजनीतिक नारामा सीमित नराखी आर्थिक दृष्टिकोण, राजनीतिक संस्कार, नेतृत्वको जिम्मेवारी, सुशासन, उत्पादन, उद्यमशीलता र नागरिक दायित्वसँग जोडेर हेर्नुपर्ने विषयमा समेत जोड दिएका थिए।
बद्री अर्यालद्वारा लिखित यी दुई पुस्तकले नेपालको समृद्धिका लागि आवश्यक आर्थिक र राजनीतिक दृष्टिकोणलाई अलग–अलग कोणबाट प्रस्तुत गरेका छन्। ‘समृद्ध नेपालको आर्थिक दिग्दर्शन’ मा उत्पादन, उद्यमशीलता, आर्थिक राष्ट्रवाद, आत्मनिर्भरता, रोजगारी र आर्थिक रूपान्तरणका विषयलाई केन्द्रमा राखिएको छ भने ‘समृद्ध नेपालको राजनीतिक दिग्दर्शन’ मा राजनीतिक नेतृत्व, दलको भूमिका, लोकतान्त्रिक संस्कार, राजनीतिक आचरण, सुशासन र राष्ट्र निर्माणमा राजनीतिक शक्तिको जिम्मेवारीका विषय उठाइएको छ। दुवै पुस्तकलाई नेपालको समृद्धि र राजनीतिक–आर्थिक रूपान्तरणका विषयमा सार्वजनिक बहस विस्तार गर्ने प्रयासका रूपमा प्रस्तुत गरिएको छ।
अन्तमा आफ्ना भनाइ राख्दै दुवै पुस्तकका लेखक बद्री अर्यालले पुस्तक समीक्षा गर्नुहुने महानुभाव एवं कार्यक्रम सफल बनाउन सहयोग गर्नुहुने सम्पूर्ण सहयोगी, शुभेच्छुक तथा सद्भावना व्यक्त गर्नुहुने आत्मीय जनहरुमा हार्दिक धन्यवाद प्रकट गर्नुभएको थियो। उक्त कार्यक्रममा राजनीतिकर्मी, साहित्यकार, पत्रकार, कानुन व्यवसायी, खेलाडी, युवा तथा विभिन्न क्षेत्रका व्यक्तित्वहरूको सहभागिता रहेको थियो।
