दमौली सभा स्थगितः रास्वपाभित्र रणनीति कि सम्बन्धको दूरी ?
तनहुँको दमौलीमा तय गरिएको राष्ट्रिय स्वतन्त्र पार्टी (रास्वपा) को चुनावी सभा अन्तिम समयमा स्थगित भएपछि यसको कारणबारे राजनीतिक वृत्तमा विभिन्न अड्कलबाजी सुरु भएका छन्। आइतबार दमौली मा आयोजना गर्ने तयारी गरिएको उक्त सभामा पार्टी सभापति रवि लामिछाने र वरिष्ठ नेता बालेन्द्र साह सहभागी हुने कार्यक्रम सार्वजनिक गरिएको थियो।
पार्टी स्रोतले कार्यक्रम स्थगनलाई स्वास्थ्य अवस्था र व्यवस्थापनसम्बन्धी कारणसँग जोडेर व्याख्या गरे पनि, घटनाक्रमलाई नजिकबाट नियालिरहेका राजनीतिक विश्लेषकहरू भने यसलाई केवल प्राविधिक विषय मान्न तयार देखिँदैनन्। विशेषगरी स्वर्णिम वाग्ले र बालेन्द्र साहबीचको सम्बन्ध अपेक्षाजस्तो सहज नरहेको चर्चा पार्टीभित्रै सुनिन थालेको बताइन्छ।
स्थानीय तहमा विकसित राजनीतिक समीकरण, विशेषतः नेपाल कम्युनिस्ट पार्टी ९एमाले० सँग देखिएको तिक्तता पनि कार्यक्रम स्थगनसँग जोडेर हेरिएको छ। तनहुँको निर्वाचन क्षेत्रमा दलहरूबीचको प्रतिस्पर्धा तीव्र बन्दै जाँदा, सार्वजनिक कार्यक्रमहरूको सन्देशात्मक महत्त्व झन् बढेको छ। यस्तो अवस्थामा कार्यक्रम स्थगनले रणनीतिक पुनर्विचारको संकेत दिएको विश्लेषण भइरहेको छ।
केही समयअघि पोखरा जाने क्रममा दमौलीमा रोकिने चर्चा भए पनि बालेन्द्र साह सिधै गन्तव्यतर्फ लागेका थिए। त्यस घटनालाई समेत अहिलेको सन्दर्भसँग जोडेर हेरिएको छ। स्थानीय कार्यकर्तामाझ उक्त घटनाले नेतृत्वबीच समन्वयको प्रश्न उठाएको बताइन्छ।रास्वपा नयाँ राजनीतिक शक्तिका रूपमा उदाउँदै गर्दा नेतृत्वबीचको तालमेल, भूमिकाको स्पष्टता र क्षेत्रीय प्रभाव व्यवस्थापन मुख्य चुनौतीका रूपमा देखिन थालेको छ।
तनहुँ जस्तो संवेदनशील निर्वाचन क्षेत्रमै कार्यक्रम स्थगित हुनु संयोग मात्र कि संगठनभित्रको प्राथमिकता–संघर्षको संकेत हो भन्ने प्रश्न उठेको छ।औपचारिक रूपमा कार्यक्रम स्थगनलाई सामान्य व्यवस्थापकीय निर्णय भनिए पनि, यसले रास्वपाको आन्तरिक समन्वय, नेतृत्वबीचको सम्बन्ध र स्थानीय रणनीतिबारे बहसलाई सतहमा ल्याएको छ। आगामी दिनमा संयुक्त कार्यक्रम, सार्वजनिक उपस्थिती र सन्देशको एकरूपताले मात्र यी अड्कलबाजीलाई अन्त्य गर्न सक्ने देखिन्छ।