तनहुँको ऐना पहरामा फेरी बस दुर्घटना,पुरा विवरण आउन बाँकी
166
Shares
तनहुँ, १८ साउन । गोरखा–चितवन चल्ने बस तनहुँको आँबुखैरेनी गाउँपालिका २ ऐना पहरा क्षेत्रमा आइतबार दिउँसो दुर्घटनामा परेको छ। ग २ ख १०७७ नम्बरको बस दुर्घटनामा परेको प्रहरीले जनाएको छ ।
बस रोकेर केही यात्रु ऐना पहरा घुम्न गएका थिए भने केही यात्रु बसभित्रै थिए। प्रहरीका अनुसार बस पार्किङबाट स्टार्ट गरी सडकमा ल्याउन लाग्दा हुत्तिएर सडकबाट केही मिटर तल खसेको हो।
दुर्घटनामा चालकसहित ५ जना यात्रु घाइते भएका छन्। यो बस गोरखाबाट चितवन कि चितवनबाट गोरखा जाँदै थियो यकिन भइसकेको छैन।
प्रहरीहरूले पनि फरक फरक विवरण उपलब्ध गराएका छन्। घाइतेहरूलाई आँबुखैरेनीस्थित अस्पतालमा उपचारका लागि लगिएको छ। घटनास्थलमा नेपाली सेना, नेपाल प्रहरी र सशस्त्र प्रहरी खटिएका छन्। ऐना पहरा क्षेत्रमा यसअघि पनि दुर्घटना भएको थियो। दुर्घटनामा २७ जनाको मृत्यु भएको थियो ।