सत्ता र संगठनको बलमा विरोधी शक्तिसँग भिड्दै ओली, प्रचण्ड र देउवा
काठमाडौं, २३ चैत्र । देशमा दुईथरी टकराव बढ्दो छ । एकथरी गणतन्त्रवादी र अर्काथरी राजावादी । अनि फेरि एकथरी नयाँ पुस्ता अनि अर्काथरी पुराना पुस्ता । यो टकराव पार्टीहरुबीच र पार्टीहरुभित्र पनि चलिरहेको छ ।
देशका मुख्य शक्ति केपी शर्मा ओली, पुष्पकमल दाहाल प्रचण्ड र शेरबहादुर देउवाको हातमा छ । राज्यको मुख्य संयन्त्रहरुमा यीनकै हालीमुहाली छ । सत्ता अनि शक्ति यीनकै हातमा छ । यी तीनजनाविरुद्ध उनीहरुकै दलका नयाँ पुस्ताले चुनौती दिइरहेका छन् । अर्कोतर्फ, नयाँ शक्तिका रुपमा आएका रास्वपाले पनि चुनौती दिइरहेका छन् ।
रास्वपा सभापति रवि लामिछाने ओली, प्रचण्ड र देउवा तीनैजनाका साझा प्रतिष्पर्धी हुन् । पुस्ताको फरक मात्र नभएर गणतन्त्रवादी धारकै भएर भिन्न दलको हुनुले पनि प्रतिष्पर्धी हुन् । नयाँ शक्तिका रुपमा लामिछानेको उदय अर्को चुनावसम्मका लागि चुनौती बन्न सक्छन् फेरि । यसकारण रवि यी तीन नेताको तारोमा छन् ।
लामिछानेलाई विगतमा ओलीले साथ लिएर देउवाविरुद्ध लगाए । अहिले प्रचण्डले ओलीविरुद्ध लगाउन खोजे । वास्तवमा उनी तीनैजनाका साझा प्रतिष्पर्धी हुन् ।
गणतन्त्रवादी ओली, प्रचण्ड र देउवाका साझा प्रतिष्पर्धी राजावादी पनि हुन् । त्यसैले राजावादीको आन्दोलनमा तीनैजनाको उस्तै धारणा देखिन्छ । राजावादीमाथिको दमनमा तीनैजना नेताको भूमिका देखिन्छ । राजावादीलाई पक्राउ गर्दा काँग्रेस, एमाले र माओवादी तीनवटै दलका कार्यकर्ता उत्साही छन् ।
सत्ता र संगठन ओली, देउवा र प्रचण्डको पक्षमा छ । त्यही शक्तिले उनीहरु विरोधीमाथि हावी भइरहेका छन् । नयाँ शक्ति भनिएका र राजावादी भनिएकाको बलियो संगठन देखिएको छ्रन् ।
अहिले देशमा काँग्रेस, एमाले र माओवादीपछि सबैभन्दा बलियो संगठन हिन्दुवादीको छ । तर, राजावादीले हिन्दुवादीभन्दा आफूलाई बलियो देखाउन खोज्ने र हतारिएर बढ्न खोज्ने गरेबाट क्षति व्यहोरेका छन् । हिन्दुवादी काँग्रेस, एमाले र माओवादीमा पनि हुनुले ओली, देउवा र प्रचण्डलाई डर छ । हिन्दुवादीमाथि दमन गरेका पार्टीभित्रै विद्रोह हुनसक्ने भय उनीहरुमा छ ।