मालपोत, नापी देखि पालिकामा सरुवामा मन्त्रीबाटै बिचौलिया परिचालन
काठमाडौं, २० चैत्र । प्रधानमन्त्री केपी शर्मा ओलीले सरकारी कार्यालयहरुमा काम छिटोछरितो गर्न र घुसखोरी अन्त गर्नका लागि संसद अधिवेशन सुरु हुनुभन्दा ५ दिनअघि अध्यादेश ल्याउनुपरेको प्रष्टीकरण दिने गरेका छन् । तर उनकै नेतृत्वको सरकारका मन्त्रीहरु भने कर्मचारी सरुवामा करोडौं असुलीमा तल्लीन छन् । ओली सरकारका मन्त्रीहरुले बिचौलिया र दलालमार्फत् कर्मचारी सरुवामा रकम उठाउने र नियम र मापदण्डबिपरीत सरुवा गरेका छन् । जुन कर्मचारीले रकम बुझाएर सरुवा हुन्छ, उसबाट घुसबिना कामको अपेक्षा कसरी गर्र्न सकिन्छ ।
संघीय मामिला तथा सामान्य प्रशासन मन्त्री राजकुमार गुप्ता र भूमिब्यवस्था, सहकारी तथा गरिबी निवारण मन्त्री बलराम अधिकारीले कर्मचारी सरुवामा रकम उठाउन दलाल परिचालन गरेको सर्वत्र जगजाहेर छ ।
गएको असोजमा भूमिब्यवस्था मन्त्री अधिकारीले ४ सय १८ कर्मचारीको सरुवामा ६ करोड असुली गरेको आरोप छ । तत्कालीन भूमिब्यवस्था बिभागका महानिर्देशक कृष्णप्रसाद सापकोटालाई सरुवा गर्ने भन्दै तर्साएर दलाल प्रमोद खड्काले दिएको सूची अनुसार सरुवा गर्न लगाए ।
उपत्यकाका मालपोत कार्यालयमा बर्षौ बसेका र अकूत सम्पत्ति कमाएका कर्मचारीलाई पुनः उपत्यकाकै अर्को कार्यालयमा आर्थिक लेनदेनको आधारमा सरुवा गरेको भनेर चर्को बिरोध भयो । बिरोध भएपछि उनले सबै दोष सापकोटाको टाउकोमा थोपरेर पानीमाथिको ओभानो बन्ने प्रयास गरेका थिए । तर दलालमार्फत् मन्त्री अधिकारीले नै दररेट असुली गरेर सरुवा गरेको वास्तविकता बिस्तारै खुल्यो ।
सामान्य प्रशासन मन्त्री गुप्ताले गएको भदौ अन्तिममा १ हजार २ सय कर्मचारीको सरुवामा बोलकबोल नै गरेर विवादमा आएका थिए । उनका स्वकीय उपसचिव शिव पटेलले नगरपालिकाका प्रमुख प्रशासकीय अधिकृतका लागि उपसचिवसँग ७ देखि १० लाख घुस मागेको ह्वाट्सएप म्यासेज नै सार्वजनिक भयो । तर प्रधानमन्त्री केपी शर्मा ओलीले कर्मचारी सरुवामा असुली गर्ने दुबै मन्त्रीलाई हटाउने भाषणा त गरे तर हटाएनन् ।
मन्त्रीद्वय गुप्ता र अधिकारीले परिवारका सदस्यमार्फत्मात्र होइन, दलाल नै परिचालन गरी रकम असुली गर्न थालेका छन् । प्रमोद खड्का नामका दलालको बास नै गुप्ता र अधिकारीको निवासमा हुने गरेको छ ।
काठमाडौं उपत्यकाका मालपोत कार्यालयका खरिदारदेखि नायबसुब्बा, अधिकृत, कम्प्युटर अप्रेटरदेखि कार्यालय प्रमुखसम्मको सरुवामा ५ लाखदेखि २० लाख रुपैयाँसम्म खुलेआम माग्ने गरेका छन् । पछिल्ला दिनमा दलाल खड्काले काठमाडौं उपत्यकाका साँखु, ललितपुर, भक्तपुर, कलंकी, मनमैजु, चाहविल मालपोत कार्यालयमा कार्यरत खरिदारदेखि कम्प्युटर अप्रेटर, नायबसुब्बा र अधिकृतको सूची बनाएर सामान्य प्रशासन मन्त्री गुप्तामार्फत् अन्यत्र सरुवा गराउने र ती ठाउँमा ५ देखि २० लाखका दरले दररेट लिंदै सरुवा गराउने खेलमा लागेका छन् ।
कतिपय कर्मचारीले केको लिष्ट बनाएको भनेर सोधीखोजी गर्दा खड्काले ‘तिमीहरु मलाई भेट्न आउँदैनौं, सामान्य प्रशासन मन्त्री गुप्ता र भूमिब्यवस्था मन्त्री अधिकारीलाई मैले उठाएर बुझाउनुपर्छ, त्यही भएर सूची बनाएको’ भनेर हाक्काहाक्की भनेको भूमिब्यवस्था मन्त्रालयका एक अधिकृत बताउँछन् ।
मन्त्रीद्वय गुप्ता र बलरामको आडमा मालपोतका कर्मचारीको सूची दलाल खड्काले बनाउने र दररेट लिंदै सरुवा गर्ने गरेका छन् । काठमाडौं उपत्यकाका मालपोत कार्यालयमा सरुवा भएको १ बर्षमात्र भएका वा २ बर्ष नपुगेका कर्मचारीसँग पनि खड्काले मन्त्रीको नाममा पैसा माग्ने, नदिए सामान्यबाट अन्य मन्त्रालय वा उपत्यका बाहिरका कार्यालयमा सरुवा गर्नका लागि उनले सूची बनाएर आतंकित पार्ने काम गरेका छन् ।
खड्काले खरिदार, कम्प्युटर अप्रेटर र नासुको ५ लाख र अधिकृतको १० लाख र उपसचिवको २० लाख दररेट लिएर एकमुष्ट मन्त्रीद्वयलाई बुझाउने गरेकाले उनी उपत्यकाका मालपोत कार्यालयमा छायाँ मन्त्री भनेर चिनिन्छन् । भूमि ब्यवस्थापन तथा अभिलेख बिभागमा महानिर्देशक शिवप्रसाद रेग्मीलाई समेत खड्काले मिलाएर सरुवाको भागबण्डा दिने गरेका छन् ।
महानिर्देशक रेग्मीमात्र होइन, बिभागका उपसचिव टेकराज अर्यालसँग पनि खड्काको सेटिङ हुँदैआएको छ । अर्याल भूमिब्यवस्था मन्त्रालयमा हुँदा पनि खड्काको सेटिङ चल्दैआएको थियो । बिभागका महानिर्देशक रेग्मीले दृष्टि प्रतिनिधिसँग आफूले दलालको कुरा नसुनेको दाबी गरे । उनले भने–‘मैले मन्त्री र सचिवले भनेको मात्र गरेको छु ।’
बिचौलिया खड्काले सरुवाको सेटिङ गरी करोड बुझाउने भएपछि ओली सरकारका दुबै मन्त्री उनको सूची नै सचिव र बिभागीय प्रमुखहरुलाई दिंदै सरुवा गर्न निर्देशन दिने गरेका छन् । काठमाडौं उपत्यकामा ५ बर्ष, ६ बर्ष काम गरिसकेकाहरुलाई नै पुनः उपत्यकाकै अर्को कार्यालयमा खड्काले सरुवा गराउने काम पनि गरेका छन् ।
मन्त्रीका विश्वासपात्र बिचौलिया खड्काले हालै ललितपुरमा काजमा कार्र्यरत एक शाखा अधिकृतलाई साँखुमा सरुवा गराएका छन् । सामान्य प्रशासन मन्त्रालयमा समेत सेटिङ गरेर उनले साँखुमा सरुवा गराएका हुन् ।
डिल्लीबजार मालपोत कार्यालयमा ६ बर्ष बसेका एक कम्प्युटर अप्रेटरलाई उदयपुर सरुवा गरिएको थियो । तर मन्त्रीका दलाल खड्काले उदयपुरको सरुवा रद्द गरी भक्तपुर दरबन्दी मिलाइदिएका छन् । प्रमोद खड्काले भक्तपुर मालपोतका कार्यालय प्रमुख कुमारप्रसाद आचार्यसँग पनि मन्त्रीको नाममा ठूलो रकम मागेको नदिएपछि उनलाई समेत सरुवा गराउन मन्त्री बलरामलाई मनाइसकेका छन् ।
उदयपुर घर भएका प्रमोद खड्का विगत लामो समयदेखि कर्मचारी सरुवामा रकम उठाउने बदनाम बिचौलिया हुन् । उनको बास नै सामान्य वा भूमिब्यवस्था मन्त्रीद्वय गुप्ता र अधिकारीकोमा हुने गरेको छ । पेशा केही नभएका खड्का १ करोडको स्कोरपियो चढ्छन् भने करोडौंको सम्पत्ति जग्गा जमिन उनले जोडिसकेका छन् ।
गुप्ता र अधिकारीलाई उनले तिमी सम्बोधन गर्दै भन्ने गर्दछन् ‘फेरि मन्त्री हुने होइनौं, मौकामा चौका हान, खुरुखुरु मैले दिएको सूची अनुसार सरुवा गर, २–४ करोड उठाइदिन्छु भनेका छन् । त्यही भएर ओली सरकारका यी दुबै मन्त्री सरुवाबाटै १० करोड भन्दा बढी उठाउने दाउमा लागेका छन् । सरकार गठनको एक बर्ष पुगिसकेको छ । सरुवामा विबादमा परेपछि ४ महिनामै बर्खास्त हुने भनेर चर्चामा आएका गुप्ता र अधिकारी अब हट्न सक्ने भएकाले सरुवामा असुलीमा लागेका छन् । असुलीको सबै चाँजोपाँजो प्रमोद खड्काले मिलाएका छन् ।-दृष्टि साप्ताहिकबाट