अमेरिकाको विमानस्थलबाटै पक्राउ परेका रास्वपा नेता मोहन थापा को हुन् ?
काठमाडौं,१८ फागुन । राष्ट्रिय स्वतन्त्र पार्टी (रास्वपा) का केन्द्रीय सदस्य मोहन थापा पक्राउ परेका छन् । रास्वपा सभापति रवि लामिछानेसँग अत्यन्त निकट रहेका थापा अमेरिकाको विमानस्थलबाटै पक्राउ परेका हुन् ।
थापा के अपराधमा पक्राउ परेका हुन् त्यो भने खुलेको छैन् । ढाका कुमार श्रेष्ठले पैसाको लेनदेन गरेको आरोप लागेका थापा केही साता अघि नेपालबाट फर्किने क्रममा पेन्सिल्भेनिया एयरपोर्टबाटै पक्राउ परेको स्रोतले जनाएको छ ।
थापालाई फिलाडेल्फियास्थित हिरासत केन्द्रमा राखिएको छ । उनी यसअघि दुई तीनपटक जेलमा परिसकेको थिए । थापामाथि नेपालमा सम्पत्ति सुद्धिकरणमा पनि अनुसन्धान थालिएपछि गत साता अमेरिका फर्किएका थिए ।
विभिन्न अपराधमा संलग्न व्यक्तिहरुलाई पक्राउ गरेर सम्बन्धित देशमा पठाउने प्रक्रिया चलिहरहेको बेला थापालाई नेपाल फर्काउने सम्भावना बढी देखिएको छ ।
केही महिनाअघि राष्ट्रसंघ महासभामा प्रधानमन्त्री केपी शर्मा ओली र परराष्ट्र मन्त्री डा।आरजु राणा देउवा न्युयोर्क गएका बेला कालो झण्डा र जुत्ताको माला देखाउने भन्दै फेसबुकबाट आह्वान समेत थापाले गरेका थिए ।
