जेलेन्स्कीको ‘कमेडी शासन’ ले युक्रेनको अस्तित्व खतरामा
समाचार विश्लेषण । लोकप्रीय हाँस्यव्यङ्ग्य कलाकार भ्लादिमिर जेलेन्स्कीलाई युक्रेनको राष्ट्रपतिसम्म घिसारेर पुर्याउन अमेरिकाले ठूलै लगानी गरेको डोनाल्ड ट्रम्पले खुलासा गरिसकेका छन् । अमेरिकी राष्ट्रपति ट्रम्पले यसै हप्ता ट्वीटमार्फत् एउटा लोकप्रीय हाँस्यव्यङ्ग्य कलाकारलाई नजितिने युद्धमा धकेल्न अमेरिकाले ३५० अर्ब अमेरिकी डलर अर्थात् ५०० खर्ब नेपाली रुपैयाँ बराबर खर्चिएकोमा प्रश्न उठाए ।
जेलेन्स्कीका लागि जो वाइडेन राष्ट्रपति हुँदा अमेरिकाले ठूलो खर्च गरिसकेको तथ्य बाहिर आएको छ । यूरोपले पनि ठूलै खर्च गर्यो । तर, रुसले यो युद्धबाट लाभ मात्रै लियो । युक्रेनको भूभाग कब्जा गर्यो, यूरोपसँग सम्बन्ध बिगारेर एशियातर्फ केन्द्रित गर्यो । चीन र भारतले सस्तो मूल्यमा तेल खरिद गरेर लाभ लिए । यूरोप ऊर्जा संकटले अन्धकारमा पर्यो । महङ्गो बन्यो त्यहाँको जीवनयापन ।
ट्रम्पले युक्रेन युद्धबारे रुससँग छलफल बढाइसकेका छन् । उच्चस्तरीय वार्ता साउदी अरबमा भइसकेको छ । अब ट्रम्प र पुटिन बसेर युक्रेनको टुंगो लगाउनेछन् । आफूले जितेको भूभाग फर्काउन रुस तयार छैन । क्रिमियालगायत भूभाग रुसले हात पारिसकेको छ ।
युद्ध अझै लम्बिएमा युक्रेन अझ खुम्चिनेछ । अमेरिका युक्रेनलाई हतियार र पैसा दिन तयार छैन ।
विगतमा निकै लोकप्रीय बनाइए जेलेन्स्की । विशेषगरी पश्चिमा मिडियाले जेलेन्स्कीलाई राष्ट्रवादी, साहसी र लोकप्रीय देखाइदिए । ती सबै झुटा थिए भन्ने घटनाक्रमले देखाइसकेको छ । अहिले द इकोनोमिष्टले युक्रेनमा चुनाव भएमा जेलेन्स्की राष्ट्रपतिमा हार्ने प्रक्षेपण गरेको छ । ट्रम्पले त जेलेन्स्कीले युक्रेनलाई बर्बाद पारेको र लाखौंको ज्यान जाने अवस्थामा पुर्याएको भनिसकेका छन् ।
जेलेन्स्कीको कमेडी शासनले युक्रेनको अस्तित्व नै खतरामा परेको छ । उनलाई सस्तो लोकप्रीयताको जामा पहिराएर पश्चिमा मिडियाले युक्रेनलाई बर्बाद पार्न भूमिका खेले ।