नेपाल भ्यालुयर्स एसोसिएशनले १४औं स्थापना दिवस भव्यताका साथ मनाउने
देशभरका सबै इन्जिनियरहरुलाई मुल्यांकनसम्बन्धि नियमित कार्य स्थगित गरी आफुलाई पायक पर्ने केन्द्र,प्रदेश वा च्याप्टरमा उपस्थित भएर उत्सवको रुपमा मनाउन आग्रह
काठमाडौं,१७ बिहीबार । मुल्यांङकन पेशामा कार्यरत ईन्जिनियरहरूको छाता संगठन नेपाल भ्यालुयर्स एसोसिएशन (एनभिए)ले १४औं स्थापना दिवस (एनभिए डे –२०८१) भव्यताका साथ मनाउने भएको छ । वि.स.२०६८ सालमा स्थापना भएको एनभिएले आगामी माघ २३ गते बुधबार विभिन्न कार्यक्रमसहित भव्यताका साथ ठमेलस्थित होटल यात्रीमा स्थापना दिवस मनाउन लागेको हो ।
कार्यक्रममा नेपाल इन्जिनियरिङ्ग परिषद (एनइसी)का अध्यक्ष प्रा.डा.पदमबहादुर शाही प्रमुख अतिथि,नेपाल इन्जिनियर्स एशोसियसन (एनइए) का अध्यक्ष ई. सुभाषचन्द्र बराल र नेपाल इन्जिनियरिङ्ग परिषदका रजिष्ट्रार ई. शिवमंगल गिरी विशेष अतिथि रहने छन् ।
उक्त दिनमा एनभिएले वरिष्ठ भ्यालुयर्स इन्जिनियरलाई विशेष सम्मान गर्ने कार्यक्रम पनि रहेको छ । कार्यक्रममा महासचिव ई. अशोक सिलवालले एनभिएको बारेमा संक्षिप्त जानकारी दिनेछन् । कार्यक्रमको सञ्चालन सचिव ई. रबिन्द्र अधिकारीले गर्नेछन् भने अध्यक्ष ई. संजयकुमार महतोले आफ्नो मन्तव्यसहित कार्यक्रमको समापन गर्ने कार्य तालिकामा उल्लेख गरिएको छ ।
देशभर छरिएर रहेका भ्यालुयर्स इन्जिनियरहरुलाई सम्भव भएसम्म केन्द्रमा उपस्थित हुन, सम्भव नभए प्रदेश कार्यालय र च्याप्टरहरुमा उपस्थित भई एनभिए डे –२०८१ लाई महत्वपुर्ण चाडका रुपमा मनाउन पनि एनभिएले आग्रह गरेको छ । एनभिए डे विशेष कार्यक्रमको केन्द्र, प्रदेश र च्याप्टरहरुबाट एकैपटक उद्घाटन गरिने र उक्त कार्यक्रमको नेपाली पेन डट कम र एनभिएको फेसबुक पेजबाट प्रत्यक्ष प्रशारण (लाइभ) गरिनेछ ।
एनभिएले राजधानीमा मनाउन लागेको वार्षिकउत्सवका दिन देशभरका सबै इन्जिनियरहरुलाई मुल्यांकनसम्बन्धि नियमित कार्य स्थगित गरी आफुलाई पायक पर्ने केन्द्र, प्रदेश वा च्याप्टरमा उपस्थित भएर उत्सवको रुपमा मनाउन अध्यक्ष महतोले आग्रह गरेका छन् ।
वार्षिकउत्सव कार्यक्रममा एनभिएले नेपाल इन्जिनियर्स एशोसिएशन, नेपाल इन्जिनियरिङ परिषद्, सेन्टर फर डेमोक्रेटिक इन्जिनिर्यस एशोसियन नेपाल (सिडेन), प्रोगेसिभ इन्जिनियर्स एशोसियसन नेपाल (पिन), नेपाल राष्ट्रिय इन्जिनियर संगठन (निओन), स्क्याप, सोना लगायतका इन्जिनियरिङ संस्थाहरु, नेपाल बैंकर संघ, नेपाल डेभलमेन्ट बैंकर एशोसियशन, नेपाल वित्त संघ लगायतका संस्थाहरुलाई आमन्त्रण गरिएको सचिव ई. अधिकारीले जानकारी दिए ।
एनभिए नेपालमा मूल्याङ्कन पेशाको सुदृढीकरण र प्रवद्र्धन गर्ने उद्देश्यले मूल्याङ्कनकर्ताहरूको समूहद्वारा स्थापित छाता संस्था हो । यसले देशमा मूल्याङ्कनकर्ताको पेशासँग सम्बन्धित सबै मुद्दाहरूलाई सम्बोधन गर्न सहजकर्ताको भूमिका पनि खेल्दै आएको छ । एनभिएमा ९ सय भन्दा बढी संस्थागत सदस्यहरु छन् भने ३ हजार भन्दा बढी इन्जिनियरहरु यसमा आबद्ध छन् ।
यसमा घर जग्गा लगायतका सिभिल इन्जिनियरिङ संरचना, सवारी साधन लगायत सबै मेसिनरी उपकरणहरु, कृषि आदी मूल्याङ्कन गर्ने इन्जिनियरहरू आबद्ध छन् । संस्थाले आफ्नो सेवाहरूमा नैतिकता, गुणस्तर र व्यावसायिकताको उच्चतम मापदण्डहरू कायम राख्दै आएको छ ।