कर्मनाशाको सहायक नदी गायब पारिएको प्लटिङमा को को (भिडियोसहित)
दिल लिम्बू, ललितपुर । गोदावरी नगरपालिकामा गैरकानूनी तरिकाले प्लटिङ गर्नेहरुको बिगबिगी मच्चिएको छ । प्लटिङका नाममा सार्वजनिक जग्गा मिच्ने, वन विनाश गर्ने देखि खोला नै गायब पार्ने घटना देखिन थालेको छ ।
गोदावरी नगरपालिका वडा नं १२ को ठेचो क्षेत्रमा पर्ने कर्मनाशा खोलाको सहायक खोला नरकटेको नामोनिशान मेटाउने गरी प्लटिङ भएको छ । खोलालाई खोल्छामा परिणत गरी पर्खाल लगाइएको छ । प्लटिङ गरेको माथिल्लो र तल्लो क्षेत्रमा ठूलो खोला देखिन्छ । तर, प्लटिङ भएको ठाउँमा कुलोमा परिणत गरिएको छ खोलालाई । बाटो पनि मापदण्डविपरित एकातर्फ मात्र सानो राखिएको छ ।
प्लटिङबारे गोदावरी १२ का वडाध्यक्ष जगतबहादुर महर्जनलाई सोध्दा उक्त खोला खोल्छी भएको दाबी गरे । खोल्छी भए माथि र तल किन खोलाको सीमाना त्यति ठूलो देखिन्छ भन्दा उनले प्रष्ट उत्तर दिन सकेनन् । प्लटिङलाई सिफारिश दिएकोबारे सोध्दा उनले को को सिफारिश लिन आउँछन् सबै जानकारीमा नहुने भन्दै गैरजिम्मेवारी उत्तर दिए ।
नापी र मालपोत कार्यालय ललितपुरमा बुझ्दा यसबारे अध्ययन गरी जानकारी दिने जवाफ दिइएको छ । गोदावरी नगरपालिकाका प्रवक्ता मिलन सिलवाल गैरकानूनी प्लटिङबारे सोध्दा बुझेर जवाफ दिन्छु भन्दै पन्छन थालेका छन् ।
कर्मनाशाको सहायक खोला गायब पारिएको घटनामा गोदावरी नगरपालिकाका जनप्रतिनिधि, कर्मचारी, मालपोत र नापीका कर्मचारी समेत संलग्न भइरहेको तथ्यहरु नेपाली पेनलाई प्राप्त भएको छ । यो घटनाले धेरैमाथि अख्तियारले मुद्दा चलाउने अवस्था बन्न सक्ने देखिन्छ ।
यसैगरी, चापाखर्कमा पानीको मुहान माथि वन विनाश गरी प्लटिङ भइरहेकोमा नगरपालिकाको समेत संरक्षण देखिएको छ । सरकारी जग्गासमेत दोहन गरी बिरु महर्जन नेतृत्वको गिरोहले प्लटिङ गरिरहेकोमा नगरपालिकासँग बारम्बार सोध्दा जवाफ दिइएको छैन । महर्जन पनि भूमिगत शैलीमा हिंड्न थालेको बुझिएको छ । सुमेरु सहकारीमा पूर्व सीइओ बिरुले अकूत सम्पत्ति आर्जन गरेको र सम्पत्ति शुद्धिकरणमा पनि अनुसन्धान हुने गरी उजूरी परेको बुझिएको छ ।