‘हिन्दू राष्ट्र’ मेटायौ उनीहरु दक्षिण एशियामा ‘इशाई राष्ट्र’ बनाउँदैछन्
डा. दीपेश केसीः बँगलादेशमा शेख हसिनाले एउटा ग्रान्डडिजाइनको खुलासा २०२४ को मे महिनामा गरेकी थिइन् । त्यो थियो इष्ट टिमोर जस्तै दक्षिण एशियामा ‘क्रिस्चियन देश’ बनाउने अनि बँगालको खाडीमा सैन्य अखडा बनाउने । त्यो खेल कस्ले खेल्दैछ भन्ने उनले नखोलेपनि सिधै अमेरिकातर्फ थियो । हुनपनि धर्मान्तरणले बँगलादेशको चट्टोग्राम क्षेत्र, म्यानमाको चीन क्षेत्र, मिजोरम र मनिपुरको विभिन्न क्षेत्रलाई निकै असर पारेको छ । ती क्षेत्रमा क्रिस्चियन बाहुल्य जनसंख्या छन् । ती क्षेत्रहरु द्वन्द्वग्रस्त छन् । त्यहाँ अमेरिका र पश्चिमा संस्थाहरुको गतिविधि बढी छ । त्यही क्षेत्र टुक्राएर क्रिस्चियन बाहुल्य नयाँ देश बनाउने ग्रान्डडिजाइनको खुलासाले तरंग नै ल्यायो । हसिनाको आरोपलाई बल पुग्ने गरी बँगलादेशमा तत्काललाई एउटा परिवर्तन सफल पारिएको छ । योजनामुताबिक सत्तामा अमेरिकाले पत्याएका नोबेल पुरस्कार विजेता मोहम्मद युनुस सरकार प्रमुख बनेका छन् ।
बँगलादेशमा अहिले हिन्दूहरुमाथि आक्रमण चलिरहेको छ । हिंसाको तारोमा हिन्दूहरु परेका छन् । आतंकवादी हमला भइरहेको छ । पाकिस्तानी जर्नेलहरुको भोज चलिरहेको छ । पश्चिमा लगानीमा चलेका मानवअधिकारवादी संघसंस्था सुतेका छन् । प्यालेस्टाइनी उग्रवादीको पक्षमा नेपालको सडकमा आउनेहरु हिन्दू मारिँदा मौन छन् । यी सबै घटनाले धर्मको राजनीति चल्दैन भन्ने भ्रम फैलाउनेहरु उदांगिएका छन् । शेख हसिनाले भनेजस्तै इस्ट टिमोर जस्तै इशाई राष्ट्र बनाउने योजनाहरु दुरगामी रणनीतिमा चलिरहेको घटनाक्रमले पुष्टि गर्दै लगेको छ ।
पश्चिमाहरु कहिले हतियारको बलमा उपविनेश बनाएर विश्वभर वर्चश्व बनाउन पुगे त कहिले सांस्कृतिक आक्रमण गरेर । उनीहरुले विश्वका धेरै देशलाई इशाई बाहुल्य बनाए । त्यहाँको सत्तामा आफ्नो वर्चश्व बनाए । अफ्रिका, उत्तर र दक्षिण अमेरिकामा त्यही रणनीति बनाए । एशियामा भने उनीहरुले हतियारको बलले उपनिवेश त खडा गरे तर धर्म संस्कृतिमाथि ठूलो क्षति पुर्याउन सकेनन् । उनीहरु अहिले धर्मान्तरण र सांस्कृतिक अतिक्रमणबाट आफ्नो वर्चश्व बनाउन खोजिरहेका छन् । त्यो दक्षिण एशियामा मात्र नभई नेपालमा पनि चलिरहेको छ । उनीहरुकै दबाबमा नेपालमा धर्मनीरपेक्ष संविधानमा लेखिएको घाम जत्तिकै छर्लंग छ । हसिनाले भनेजस्तै पश्चिमाहरु दक्षिण एशियामा नयाँ इशाई राष्ट्र बनाउने योजनामा लागिरहँदा नेपालमा भने नेताहरु विश्वको एकमात्र हिन्दूराष्ट्रको परिचय नै नामेट पारे । यो अक्षम अपराध थियो भन्ने समयले प्रमाणित गर्ने नै छ ।
बँगलादेशमा हिन्दूहरुको नरसंहार विगतमा पनि भएकै थियो । यसपटक सत्ता परिवर्तनका दौरान पनि भयो । हिन्दूहरु दक्षिण एशियामा आधार बनाउन सकेका छन् । उनीहरु त कतिपय क्षेत्रबाट लखेटिए या मारिए । दक्षिण एशियाकै अफगानिस्तानबाट हिन्दू नामेट जस्तै भए । विगतमा हिन्दूहरु बहुमतमा थिए त्यहाँ । १९औं शताब्दीको शुरुमा लाखौंको संख्यामा थिए । त्यसको अन्ततिर केही हजारमा झर्न पुग्यो । अहिले त्यहाँ १५० भन्दा कम हिन्दू र शिख छन् त्यो पनि आतंकवादी हमलाको तारोमा पर्दै घटिरहेका छन् । पाकिस्तानमा हिन्दूको संख्या घट्दो छ । बँगलादेशमा पनि त्यही हालत छ । भुटानबाट पनि धेरै हिन्दू लखेटिए । अब नेपाल र भारत मात्र ८० प्रतिशतभन्दा बढी हिन्दू बाहुल्य देश हुन् सँसारमा । हिन्दू सभ्यतामाथिको आक्रमणको तारोमा यीनै दुई देश बढी पर्दै आएका छन् । नेपाल त परिनै रहेको छ ।
बँगलादेशको बाटो
धेरैका लागि नेपाल बँगलादेशको बाटोमा जाँदैन भन्ने भ्रम छ । तर, नेपाल थेग्नै नसक्ने गरी त्यो बाटोमा गइरहेको छ । आफ्नो धर्म संस्कृतिमाथि आक्रमणको मार्ग प्रशस्त गरिदिन जिम्मेवार दलका नेता नै लागेका छन् । उनीहरु कतिपय अवस्थामा हली नै बनेका छन् तिनको । हिन्दूहरु प्रयोग गरेर हिन्दूहरुविरुद्ध योजनावद्ध गतिविधि चलाइएका छन् । हिन्दू धर्ममा आस्था राख्नेहरुबीच विभाजनको रेखा कोरिएको छ । जनजातिहरुलाई हिन्दू होइनौं भन्ने अभियान चलाइएको छ । धर्मान्तरणबाट गैरहिन्दू बाहुल्य क्षेत्र नै बनाइएको छ । त्यस्ता क्षेत्र काठमाडौं वरपरका जिल्लामा नै हुनु अर्थपूर्ण छ । भविष्यमा बँगलादेशमा जस्तै नेपालमा पनि गैरहिन्दू प्रान्तको निर्माण गर्ने दबाब बनाइनसक्छ ।
तराईमा सीके राउतको पृथकतावादी गतिविधि त एउटा प्रयोग मात्र थियो त्यो कुनै न कुनै रुपमा प्रयोगमा ल्यान्छ नै । यो हिन्दूहरुमाथि योजनावद्ध तरिकाले दबाब बनाउने ग्रान्डडिजाइन अन्तर्गत हो । हिन्दूलाई गैरहिन्दू हौ भन्ने परिचय बनाउन एउटा समूह नै लागिपरेको छ । उनीहरु अन्तगत्वा हिन्दू समुदायसलाई अल्पमतमा पार्न उद्धत छन् ।
गैरहिन्दूको संख्या बढेको जनगणनाले देखाइरहेको छ । त्यो संख्या बढ्नुमा गैरकानूनी आप्रवासीको घूसपैठ र धर्मान्तरण नै हो । नत्र उनीहरुको संख्या कसरी बढ्छ । अब त्यही संख्यामा खेल्न योजनावद्ध तरिकाले लागेका छन् यो क्षेत्रमा अस्थिरता चाहनेहरु ।
अहिले त हिन्दू बहुमतमा छन् । तिव्र गतिमा यही योजना सफल हुँदै गए अबको एक सय वर्षभित्र नेपालमा हिन्दू अल्पमतमा हुनेछन् । त्यतिबेला नेपाललाई अफगानिस्तान बनाउने ग्रान्डडिजाइन सफलतातर्फ पुग्नसक्छ । मधेश टुक्राउन खोज्ने ग्रान्डडिजाइन विफल भयो पहाड र हिमालसँगको सांस्कृतिक र धार्मिक समानताले । यसैले अर्को तरिकाले यहाँ कुनै गैरहिन्दू प्रान्त हुँदै देश नै बनाउने षड्यन्त्र चलाइएको छ । यसकारण पनि हिन्दू बौद्ध सनातनीहरु बेलैमा जाग्न जरुरी छ । हिन्दूहरु संगठित हुन जरुरी छ । संगठित हिन्दू शक्ति नै धर्मान्तरण रोक्न सफल हुन्छ । हिन्दूले पीछडिएका र विपन्न हिन्दूलाई साथ दिने भावनाको विकास गर्न सक्नुपर्छ । यसो भएमा सांस्कृतिक आक्रमणबाट नेपाललाई बर्बाद बनाउन खोज्नेहरुको सपना साकार हुनेछैन ।