सुनकाण्डमा ठूलै राजनीतिक कनेक्शनको रहस्य खुल्दै, ओली र श्रेष्ठबीच आरोप प्रत्यारोप
काठमाडौं, ९ साउन । एक सय केजी सुन तस्करी खुलेपछि यसको उच्च तहको कनेक्शनहरु उजागर हुन थालेको छ । देशको सुरक्षा र सूचनाको मुख्य संयन्त्रमा पहुँच हुने प्रधानमन्त्री, गृहमन्त्रीलगायत मुख्य व्यक्तिहरु यति ठूलो तस्करीबारे अन्जान हुने पत्याउन सकिदैन । अझ प्रधानमन्त्री र गृहमन्त्री भइसकेकाहरुका पछिल्ला अभिव्यक्तिले सुन तस्करमा उच्च राजनीतिक नेतृत्व जानकार हुन्छन् भन्ने पुष्टि हुन्छ ।
सोमबार कम्बोडियाबाट फर्किएपछि त्रिभुवन अन्तर्राष्ट्रिय बिमानस्थलमा पूर्वप्रधानमन्त्री केपी शर्मा ओलीले सुन तस्करीमा उपप्रधान तथा गृहमन्त्री नारायणकाजी श्रेष्ठ संलग्न रहेको आरोप लगाए । गृहमन्त्रीको संलग्नता विना भन्सारको सुरक्षा घेरा काटेर सुन बाहिर जान नसक्ने समेत बताए ।
ओलीले सुन तस्करी प्रकरणबारे विमानस्थलमा भने, ‘गृहमन्त्रीले बताउनुपर्यो उहाँको संलग्नता छ कि छैन यसमा ?’
गृहमन्त्री श्रेष्ठले ओलीतर्फ संकेत गर्दै भ्रष्टाचार र तस्करीको जालो उच्च राजनीतिक तहसम्म फैलिएको बताएका थिए । त्यसप्रति आक्रोश पोख्दै ओलीले अभिव्यक्तिलाई अनैतिक र गैरजिम्मेवार भने । श्रेष्ठले कुनैपनि टार र कोटमा भएकालाई पनि नछाड्ने बताएका थिए । टार बालुवाटार र कोट बोलकोट अर्थ लाग्छ । यसप्रति ओली आक्रोशित भए ।
ओली प्रधानमन्त्री हुँदा पनि ३३ किलो सुन प्रकरण खुलेको थियो । यो प्रकरणमा ज्यान नै लिने घटना भएको थियो ।
नेपालमा साउन २ गते ब्रेक सु भित्र हङकङबाट तस्करी गरी ल्याइएको एक सय केजी सुन त्रिभुवन अन्तर्राष्ट्रिय विमानस्थलको भन्सार बाहिरबाट ३ साउनमा बरामद भएपछि राजनीतिक तहमा समेत तरंग आएको छ । गृहमन्त्री श्रेष्ठले तस्करी नियन्त्रणमा कठोर कदम चाल्न थालेका छन् ।
ठगी र तस्करीका घटनामा एमाले नेता तथा कार्यकर्ता धमाधम पक्राउ परिरहेका छन् । यसकारण नेकपा माओवादी केन्द्रका उपाध्यक्ष समेत रहेका गृहमन्त्री श्रेष्ठ एमालेको तारोमा छन् ।
श्रेष्ठले भुटानी शरणार्थी प्रकरणमा एमाले नेताहरुलाई जेल हालिदिए । ललिता निवास प्रकरणको फाइल खुल्यो । अहिले सुन तस्करीमा ठूलै गिरोह मुछिएको छ ।
